आमदार रोहित पवारांची ‘पॉवर’ पुन्हा सिद्ध; विजेसाठी ४ कोटी २४ लाखांचा निधी मंजूर

    जामखेड : शेतकरी प्रश्नांची सोडवणूक करण्यासाठी कायम आग्रही असलेले राष्ट्रवादीचे युवा नेते आमदार रोहित पवार यांनी कर्जत-जामखेड मतदारसंघाच्या वीजप्रश्नी पाठपुरावा करून ४ कोटी २४ लाख रुपयांचा निधी मंजूर करून आणला. त्यामुळे जिव्हाळ्याचा विषय असलेल्या विजेच्या प्रश्नातही आमदार पवारांची ‘पॉवर’ पुन्हा एकदा सिद्ध झाली आहे.

    पंडित दीनदयाल उपाध्याय ग्रामज्योती योजनेअंतर्गत मतदारसंघातील विविध कामांसाठी हा निधी मंजूर करण्यात आला आहे. शेतकरी व नागरिकांना कृषीपंप व घरगुती वीजेबरोबरच वाणिज्य व औद्योगिक कारणांसाठी विजेची आवश्यकता असते. त्या अनुषंगाने आमदार पवारांनी पंडित दीनदयाल उपाध्याय ग्रामज्योती योजनेंतर्गत ११ के.व्ही. दाबाच्या वीज उपकेंद्रासाठी वीज वितरण कंपनीच्या जिल्हा व तालुका स्तरावर वेळोवेळी बैठका घेतल्या. या योजनेंतर्गत ग्रामीण भागातील विजेचे प्रश्न सोडवण्यासाठी अगोदर स्थानिक पातळीवरच कामे निश्चित केली जातात.

    शासनस्तरावर ही कामे प्रस्तावित केली जाऊन राज्य व केंद्र शासनाच्या माध्यमातून निधी उपलब्ध करण्यात येतो. मात्र, निधीच्या उपलब्धतेसाठी आमदार पवारांनी केलेला पाठपुरावा शेतकऱ्यांना दिलासा देणारा ठरला आहे. कर्जत तालुक्यातील मांदळी येथील गावठाण वाहिनीच्या अलगीकरणासाठी ४३ लाख रुपये निधी मंजूर करून घेतला असून, मांदळीसह निमगाव व परिसरातील गावात गावठाण फिडरसाठी सुमारे ११ किमी लांबीची नवीन उच्चदाबाची वाहिनी कार्यान्वित करण्यात आली.

    तीन नवीन रोहित्र उभारण्यात आले आहेत. यामुळे येथील नागरिकांना थ्री फेज विजेचा २४ तास पुरवठा होत आहे. कर्जत तालुक्यातील गणेशवाडी येथील नवीन वीज उपकेंद्रासाठी केलेल्या पाठपुराव्यातून २ कोटी ७३ लक्ष रुपयांचा निधी मंजूर होऊन हे उपकेंद्रही कार्यान्वित झाले आहे. बाभूळगाव दुमाला येथील मोहिते वस्ती, करमनवाडी येथील खराडे वस्ती, गणेशवाडी येथील दातीर वस्ती, काळेवाडी येथील जिराफवस्ती, चिलवडी येथील नवले वस्ती, करपडी येथील मोहिते वस्ती, बारडगाव दगडी येथील घासले वस्ती, म्हाळंगी येथील जगताप वस्ती तसेच निमगाव गांगर्डा, मांदळी व निमगाव आदी गावे व वाड्या-वस्त्यांसाठी नवीन ११ रोहित्रे मंजूर करण्यात आलेली आहेत.

    जामखेड तालुक्यातील पिंपळगाव उंडा येथील मोरे वस्ती, पिंपळगाव आळवा येथील बारवकर वस्ती, बांधखडक येथील चव्हाण वस्ती, तेलंगशी येथील मोरे वस्ती, जवळके येथील वाळूंजकर-कांबळे वस्ती व घोडेगाव येथील तळेकर वस्तीसाठी नवीन ६ रोहित्रे मंजूर झालेली आहेत. त्यामुळे विविध भागात अनेक दशकांपासून असलेला वीजप्रश्न मार्गी लागला असून आमदार पवार यांच्या या यशाचे कर्जत जामखेडमधील नागरिकांकडून कौतुक होत आहे.

    मतदारसंघातील अनुशेष भरून काढण्यासाठी प्रयत्न

    ‘मतदारसंघातील अनेक गावांत असलेल्या जीर्ण विजतारा, वाकलेले तसेच जमिनीत सडलेले खांब बदलले आहेत. शाळा व सार्वजनिक ठिकाणी असलेले खांब दुसऱ्या ठिकाणी हलवले आहेत. ही कामे सुरू आहेतच मात्र मतदारसंघात विजेचा अनुशेष मोठ्या प्रमाणात आहे. येत्या काळात हा अनुशेष भरून काढण्यासाठी माझा प्रामाणिक प्रयत्न सुरू आहे’, असे आमदार पवार यांनी सांगितले.