हे तर पळ काढण्यासाठी बळ वापरणारे सरकार; भाजपची ठाकरे सरकारवर टीका

    अहमदनगर / नवराष्ट्र न्यूज नेटवर्क : भाजपचे ज्येष्ठ नेते आणि माजी खासदार डॉ. किरीट सोमय्या (Kirit Somaiyya) यांच्या दौऱ्यात राष्ट्रवादीच्या कार्यकर्त्यांमुळे कायदा सुव्यवस्था स्थिती बिघडेल या भीतीपोटी सोमय्या यांनाच चार भिंतीआड दडवून संकटापासून वाचविण्याची ठाकरे सरकारची युक्ती म्हणजे पळपुटेपणाची परंपरा पुढे चालू ठेवण्याचाच प्रकार आहे, अशी टीका भाजपचे जिल्हा अध्यक्ष अरुण मुंढे (Arun Mundhe) यांनी प्रसिद्धी पत्रकाद्वारे केली.

    तसेच अशा भ्याडपणामुळे राज्यातील भ्रष्टाचारास पाठबळ मिळत आहे, असा आरोपही त्यांनी केला. ते पुढे म्हणाले, भ्रष्टाचाऱ्यांना पाठीशी घालून तो उघडकीस आणणाऱ्यांवरच कारवाई करण्याच्या तालिबानी धोरणामुळेच ठाकरे सरकार सर्व आघाड्यांवर सपशेल अपयशी ठरले असून, केवळ दडपशाही करून अपयश झाकण्याचा केविलवाणा प्रयत्न आता सुरू आहे, असेही ते म्हणाले.