एका दिवसाच्या मुलीला जिवंत मारुन उकिरड्यावर फेकलं, अमरावती हळहळली

    अमरावती (Amravati) : जगाभरात महिला यशाची उड्डानावर उड्डानं घेत असताना समाज आणखीही जुन्या मानसिकतेत अडकून पडला आहे. अमरावती जिल्ह्यात मानवी मनाला हादरवून सोडणाऱ्या एकामागून एक घटना सातत्याने घडत आहे. अशीच एक घटना आज मंगळवारी समोर आली. मोरशी तालुका अंतर्गत येणाऱ्या भोईपुरी या गावात सकाळच्या सुमारास उकिरड्यावरील कचऱ्यात एक स्त्री जातीचं अर्भक मिळाल्याची माहिती समोर आली आहे. त्यामुळे गाव हादरुन गेलं. अर्भक केवळ एका दिवसाचं असल्याने ही बातमी वाऱ्यासारखी पंचक्रोशीत पसरली. अज्ञाताच्या असंवेदनशील कृत्याने सारेच जण हळहळले.

    आज मंगळवार दि. 28 डिसेंबर रोजी मोर्शी ते वरुड असलेल्या भाईपुर नजीक स्त्री जातीचे एक दिवसाचे नवजात अर्भक आढळून आल्याने परिसरात खळबळ माजली आहे. कोणीतरी अज्ञात कुमारी मातेने ‘नको’शी असलेल्या मुलीला जन्म दिला व तिला मारून फेकून दिले आहे, अशी गावात चर्चा आहे.

    याबाबतची माहिती मोर्शी पोलिसांना मिळताच पोलीस पथक घटनास्थळी पोहोचून सदर स्त्री जातीचे मृत अर्भक उपजिल्हा रुग्णालय येथे आणण्यात आले. दरम्यान, पोलीस कुमारी मातेचा शोध घेत आहे. मोर्शी पोलिस ठाण्यात या प्रकरणी अज्ञात व्यक्तीविरुद्ध गुन्हा दाखल करण्याची प्रक्रिया सुरु आहे.