बैलगाडा शर्यत (Bullock Cart Race) हा महाराष्ट्राच्या ग्रामीण भागाचा जणू श्वास आहे. या शर्यती थांबल्यामुळे तो श्वासच कोंडला होता. सर्वोच्च न्यायालयाने शर्यतींना परवानगी दिल्यामुळे तो जणू मोकळा झाला आहे, अशा शब्दांत भाजप प्रदेशाध्यक्ष चंद्रकांत पाटील यांनी सर्वोच्च न्यायालयाच्या निर्णयाचे स्वागत केले.
मुंबई : बैलगाडा शर्यत (Bullock Cart Race) हा महाराष्ट्राच्या ग्रामीण भागाचा जणू श्वास आहे. या शर्यती थांबल्यामुळे तो श्वासच कोंडला होता. सर्वोच्च न्यायालयाने शर्यतींना परवानगी दिल्यामुळे तो जणू मोकळा झाला आहे, अशा शब्दांत भाजप प्रदेशाध्यक्ष चंद्रकांत पाटील (Chandrakant Patil) यांनी सर्वोच्च न्यायालयाच्या निर्णयाचे स्वागत केले. तसेच यासाठी सर्वोच्च न्यायालयात बैलगाडा संघटनांच्या वतीने लढणारे महेश लांडगे, गोपीचंद पडळकर आणि सदाभाऊ खोत आदींचे अभिनंदन केले.
संपूर्ण महाराष्ट्रात जल्लोष
चंद्रकांत पाटील म्हणाले की, बैलगाडा शर्यतीस सशर्त परवानगी देऊन यावरील बंदी न्यायालयाने उठवली. याचा आज संपूर्ण महाराष्ट्रात जल्लोष होत आहे. न्यायालयाने महाराष्ट्राची ग्रामीण मानसिकता लक्षात घेऊन हा निर्णय घेतल्याने मनापासून आभार मानतो. २०११ मध्ये बैलांना संरक्षित प्राणी म्हणून ग्राह्य धरले गेल्याने बैलगाडा शर्यतीवर बंदी आली. प्रकाश जावडेकर यांनी बैल या प्राण्यास संरक्षित प्राणी यादीतून बाहेर काढले होते. पण दुर्दैवाने या निर्णयाला सर्वोच्च न्यायालयात आव्हान देण्यात आले. यानंतर तामिळनाडू, कर्नाटक, महाराष्ट्र यांसह अनेक राज्यांमध्ये या विरोधात तीव्र आंदोलने झाली.
तमिळनाडू सरकारने या आंदोलनानंतर त्यांच्या विधीमंडळात कायदा करुन, संपूर्ण राज्यात लागू केला. त्यानंतर कर्नाटक आणि महाराष्ट्रात माननीय देवेंद्रजी फडणवीस यांच्या नेतृत्वात राज्यात कायदा केला गेला. ते पुढे म्हणाले की, ”माननीय देवेंद्रजींच्या काळातील कायद्याला उच्च न्यायालयात आव्हान देण्यात आले. पण हा विषय सर्वोच्च न्यायालयात असल्याने यावर निर्णयाची सर्वच प्रतिक्षा करत होते. सर्वोच्च न्यायालयाने आज या शर्यतीला सशर्त परवानगी दिल्याने महाराष्ट्राच्या ग्रामीण भागात आनंदाचे वातावरण आहे. या विषयासाठी भारतीय जनता पक्षाचे आ. महेश लांडगे, गोपीचंद पडळकर, सदाभाऊ खोत आदींनी प्रचंड परिश्रम घेतले. या तिघांचेही मनापासून अभिनंदन करतो.
