शहरात पुन्हा पावसाला सुरुवात झाली आहे. डासांची उत्पत्ती झपाट्याने वाढण्याची शक्यता आहे.
पुणे : शहरात डेंग्यूच्या (Dengue cases in pune) तापात सातत्याने वाढ होत आहे. या वर्षी आतापर्यंत डेंग्यूचे एकूण 1,318 संशयित रुग्ण आणि 96 बाधित रुग्ण आढळले आहेत. यातील सर्वाधिक रुग्ण ढोले पाटील आणि औंध-बाणेर विभागीय कार्यालयांतर्गत आढळून आले आहेत. या दोन भागात शहरातील ३२ टक्के डेंग्यूचे रुग्ण आढळले आहेत, अशी माहिती पुणे महापालिकेच्या आरोग्य विभागाने दिली आहे.
दरम्यान, शहरात पुन्हा पावसाला सुरुवात झाली आहे. डासांची उत्पत्ती झपाट्याने वाढण्याची शक्यता आहे. यावर्षी एप्रिल, मे आणि जून महिन्यात शहरात डेंग्यूचा एकही रुग्ण आढळला नाही. मे आणि जून महिन्यात शहरात पाऊस झाला नाही. त्यामुळे या दोन महिन्यांत एकाही रुग्णाची नोंद झाली नाही. मात्र, जुलै महिन्यात पावसाला सुरुवात झाल्यानंतर शहरात डेंग्यूने थैमान घातलं आहे.जुलैमध्ये एकूण 225 संशयित आणि 18 बाधित रुग्ण आढळले. ऑगस्ट महिन्यात 16 क्षेत्रीय कार्यालयांमध्ये एकूण 512 संशयित आणि 47 बाधित रुग्णांचे निदान झाले आहे. गेल्या आठ महिन्यांत डेंग्यूचे निश्चित निदान झालेल्या 96 रुग्णांची महापालिकेत नोंद झाली आहे.
कोणत्या विभागीय कार्यालयात किती रुग्ण?
शहरात डेंग्यूच्या रुग्णांमध्ये वाढ झाली आहे. यामध्ये ढोले पाटील क्षेत्रीय कार्यालयात सर्वाधिक 16 तर औंध-बाणेरमध्ये 12 रुग्ण आढळून आले. यासोबतच येरवडा-कळस-धानोरीमध्ये 10, कसबा-विश्रामबागमध्ये 10, हडपसर-मुंढवामध्ये 9, घोले रोड-शिवाजीनगरमध्ये 7, नगर रस्ता-वडगाव शेरीमध्ये 5, भवानी पेठ 5, वारजे कर्वेनगरमध्ये 4, कोंढवा येथे 2. वानवडी- रामटेकडी 2, टिळक रस्ता-सिंहगड रस्ता 1, कोथरूड 1, केशवनगर 1, धनकवडी-सहकारनगर 1 रुग्ण आढळले आहेत.
रुग्ण का वाढत आहेत?
पावसाळा हा डासांच्या उत्पत्तीसाठी चांगला हंगाम आहे. त्यामुळे अनेक सोसायट्यांमध्ये आणि खाजगी मालमत्तांच्या छतावर किंवा परिसरातील कचऱ्याच्या ढिगाऱ्यांमध्ये डासांची उत्पत्ती वाढली आहे. त्यामुळे डेंग्यूच्या रुग्णांची संख्याही वाढत आहे. पावसामुळे साचलेल्या पाण्यात डासांची उत्पत्ती होत आहे. यापैकी डेंग्यू हा एडिस इजिप्ती डासामुळे होतो. हा डास स्वच्छ पाण्यात अंडी घालतो आणि त्यातून निर्माण होणाऱ्या डासांमुळे हा आजार पसरतो.
Loading ...