ललित पाटीलला ससूनमध्ये दाखल करण्यासाठी थेट दादा भुसेंचा फोन; सुषमा अंधारेंचा खळबळजनक आरोप, धंगेकरांनीसुद्धा उठवला आवाज

    Sushma Andhare : ड्रग माफिया ललित पाटीलप्रकरणात आरोपींच्या नाशिक येथील घरांची पोलिसांनी झाडाझडती घेतली असून, त्यात पेन ड्राईव्ह व मोबाईल असे इलेक्ट्रॉनिक डिव्हाईस जप्त करण्यात आले आहे. त्यातील डेटाचे विश्लेषण करण्यात येत असल्याची माहिती पोलिसांनी न्यायालयात दिली. आता या प्रकरणाने वेगळेच वळण घेतल्याने राज्याच्या राजकारणात मोठी खळबळ उडाली आहे. सत्ताधारी पक्षाच्या मंत्र्याचे थेट नाव यामध्ये घेण्यात आल्याने महाराष्ट्रातील राजकीय वातावरण चांगलेच ढवळून निघाले आहे.

    फरारी ड्रग्ज माफिया ललित पाटील ससूनमध्ये
    फरारी ड्रग्ज माफिया ललित पाटील याला ससूनमध्ये (Sasoon Drugs Case) दाखल करण्यासाठी राज्याचे मंत्री दादा भुसे (Dada Bhuse) यांचा फोन गेला होता, त्यांचे कॉल रेकॉर्ड चेक करा, असा थेट आरोप ठाकरे गटाच्या नेत्या सुषमा अंधारे (Sushma Andhare) यांनी केला. त्या आधी पुण्यातील आमदार रविंद्र धंगेकरांनीही ललित पाटीलच्या पळण्यामागे राज्यातील मंत्र्याचा हात असल्याचा आरोप केला होता. ललित पाटील हा काही दिवसांपूर्वी ससूनमधून फरारी झाला होता. त्यावरून आता आरोप-प्रत्यारोप सुरू आहेत.
    दोन कोटी रुपयांचे मेफेड्रोन
    ललित पाटील व दोन कोटी रुपयांचे मेफेड्रोन देण्यासाठी आलेला साथीदार सुभाष मंडल (वय २९, रा, देहू रस्ता, मुळ रा. झारखंड) व ससून रुग्णालयाच्या कॅन्टीनमधील कर्मचारी रौफ रहीम शेख (वय १९, रा. ताडिवाला रस्ता) यांना अटक केली. तर पोलीस ललित पाटील (वय ३४), भूषण सुभाष पाटील (रा. नाशिक) व अभिषेक विलास बलकवडे यांचा शोध घेत आहेत.

    आधी आमदार धंगेकरांचा आरोप
    ड्रग्ज माफिया ललित पाटील (Sasoon Hospital Drug Racket) पळून जाण्यात शिंदे गटातील एका मंत्र्याचा हात असल्याचा आरोप कॉंग्रेसचे आमदार रवींद्र धंगेकर यांनी केला होता. आमदार रवींद्र धंगेकर यांनी आज ससूनचे डीन डॉ. संजीव ठाकूर यांची भेट घेऊन ललित पाटील याच्यावर उपचार करणाऱ्या डॉक्टरांची माहिती मागितली. मात्र डीननी ही माहिती देण्यास नकार दिल्याने आमदार रवींद्र धंगेकर यांनी डीनच्या केबिनमध्येच ठिय्या मांडला. डीननी माहिती न दिल्याने आमदार रवींद्र धंगेकर यांनी ससूनच्या कारभाराबाबत सुनावले. ललित पाटीलवर उपचार करणाऱ्या डॉक्टरांवर गुन्हा दाखल करण्याची मागणी त्यांनी केली.

    रवींद्र धंगेकरांचा आरोप काय?
    दरम्यान, पुण्यातील कसबा मतदारसंघाचे काँग्रेस आमदार रवींद्र धंगेकर (Ravindra Dhangekar) यांनी आज पत्रकार परिषद घेऊन मोठा आरोप केला होता. ड्रग्स माफिया ललित पाटील (Sasoon Hospital Drug Racket) पळून जाण्यात शिंदे गटातील एका मंत्र्याचा हात असल्याचा आरोप धंगेकरांनी केला होता. मात्र यावेळी त्यांनी कोणत्याही मंत्र्याचं नाव घेतले नव्हते. पण, ठाकरे गटाच्या फायरब्रँड नेत्या सुषमा अंधारे यांनी आता मंत्री दादा भुसे यांचे नाव घेतल्याने या प्रकरणाला नवे वळण मिळाले आहे.

    कुठल्या आजारासाठी उपचार सुरू

    ललित पाटील फरार होऊन नऊ दिवस झाल्यानंतरदेखील त्याच्यावर कुठल्या आजारासाठी उपचार सुरू होते आणि त्याच्यावर कोण डॉक्टर उपचार करीत होते? हे ससूनकडून जाहीर करण्यात आलेले नाही. त्यामुळे ससूनच्या कारभारावर चांगलीच टीका केली जात आहे.

    ललित पाटीलच्या भावाला अयोध्येत पकडले
    ड्रग माफिया ललित पाटीलचा भाऊ भूषण पाटील आणि त्याचा साथीदार अभिषेक बलकवडेला पुणे पोलिसांच्या गुन्हे शाखेने उत्तर प्रदेशातील आयोध्येजवळून ताब्यात घेतले आहे. ललित पाटील ससून रुग्णालयातून निसटल्यानंतर भूषण पाटील आणि अभिषेक बलकवडेदेखील पसार झाले होते. भूषण पाटील हा केमिकल इंजिनिअर आहे. त्याने मेफेड्रॉन तयार करण्याचे प्रशिक्षण घेतल्यावर तो नाशिक एमआयडीसीमध्ये मेफेड्रॉन तयार करण्याचे काम करीत होता. भूषण पाटील मेफेड्रॉन तयार करायचा, अभिषेक बलकवडे त्याची वाहतूक करायचा तर ललित पाटील प्रत्यक्ष डील करायचा.