कुडकुडत्या थंडीत रेल्वेने प्रवास करताय? डोन्ट वरी! आता गाडीतच मिळवा औषधे, पांघरून आणि पुस्तके

दररोज किमान शंभर गाड्यांद्वारे लाखावर प्रवाशी नागपूर मार्गे जात असतात. या प्रवाशांची या करारामुळे मोठी सोय झाली आहे. सकाळी ६ ते रात्री ९ या वेळातच गाडीत या वस्तू विक्रीसाठी उपलब्ध राहतील. या कराराद्वारे ५ वर्षांत नागपूर विभागाला ३.४८ कोटी रुपयांचे उत्पन मिळणार आहे. नवीन वर्षात ही सुविधा सुरू होईल, असा अंदाज आहे.

    नागपूर (Nagpur) : रेल्वे गाडीने रात्री प्रवास करीत आहात आणि तुम्ही सोबत पांघरुण आणले नसेल किंवा प्रवासात खूप कंटाळा येत आहे पण वाचायला काही नसेल तर आता प्रवाशांना धावत्या गाडीतच पांघरुण, औषधी यासारख्या अनेक वस्तू खरेदी करता येणार आहे. मध्य रेल्वेच्या नागपूर विभागाने नुकताच एका कंपनीशी यासंबंधीचा करार करून प्रवाशांना ही सोय उपलब्ध करुन देण्याचे ठरविले आहे. रेल्वे प्रवाशांना नव्या वर्षाची ही अनोखी भेट ठरणार आहे.

    प्रवासात अनेकदा प्रकृती बिघडते. त्यावेळी मोठे स्टेशन येईपर्यंत प्रतीक्षा करण्याशिवाय पर्याय नसतो. तेथेही औषध मिळेलच याची खात्री नसते. पण ताप, खोकला, उलटी, हगवण, डोकेदुखी अशा सर्वसामान्य आजांरावरील औषधे या करारानुसार रेल्वेत उपलब्ध होणार आहेत. त्याचप्रमाणे चादर, पेपर नॅपकीन, चप्पल, खेळणी, सौंदर्य प्रसाधने, मास्क, सॅनिटायजर यासारख्या इतरही वस्तू गाडीतच विक्रीला उपलब्ध करून देण्यात येणार आहेत. डीआरएम ऋचा खरे यांनी याबाबतच्या प्रस्तावाला मंजुरी दिल्यानंतर एडीआरएम पी.एस. खैरकार यांच्या नेतृत्वातील पथकाने यासंबंधी एका कंपनीशी करार केला. खाद्यपदार्थ वगळता अशा अन्य वस्तू धावत्या गाडीत विकण्याची परवानगी या कंपनीला देण्यात आली आहे. ज्या वस्तू मिळतील त्यांची गुणवत्ता आणि किंमत याकडे विशेष लक्ष दिले जाणार आहे.

    नागपूर हे देशाच्या मध्यभागी असल्याने चारही दिशांच्या गाड्या येथून जातात. नागपूर विभाग दक्षिणेकडे बल्लारशा, उत्तरेकडे किरथगड (इटारसी जवळ), पश्चिमेकडे टिमटाळा (बडनेरा जवळ) येथवर आहे. दररोज किमान शंभर गाड्यांद्वारे लाखावर प्रवाशी नागपूर मार्गे जात असतात. या प्रवाशांची या करारामुळे मोठी सोय झाली आहे. सकाळी ६ ते रात्री ९ या वेळातच गाडीत या वस्तू विक्रीसाठी उपलब्ध राहतील. या कराराद्वारे ५ वर्षांत नागपूर विभागाला ३.४८ कोटी रुपयांचे उत्पन मिळणार आहे. नवीन वर्षात ही सुविधा सुरू होईल, असा अंदाज आहे.

    गैरप्रवाशी भाडे महसूल मिळविण्यासाठी वरिष्ठ मंडळ वाणिज्य व्यवस्थापक कृष्णाथ पाटील यांच्या नेतृत्वात सहायक वाणिज्य व्यवस्थापक विजय थुल, वाणिज्य निरीक्षक ताराप्रसाद आचार्य यांच्यातर्फे विविध प्रयत्न केले जात आहेत. त्यातून प्रवाशांनाही विविध सुविधा मिळू लागल्या आहेत. नागपूरने चालू आर्थिक वर्षात अशाप्रकारचा हा २६ वा करार आहे.