जातीवाचक शिवीगाळ करत साडी सूटेपर्यंत महिलेला बेदम मारहाण

पीडितेच्या अशिक्षितपणाचा फायदा घेत घटनाक्रमानुसार चुकीची तक्रार दाखल केली अन् त्यावर पीडितेचा अंगठा घेतला. हा प्रकार गावातील महिलांच्या लक्षात येताच त्यांनी एसडीओ कार्यालयात धडक देत आरोपीला तात्काळ अटक करण्याची मागणी लावून धरली.

    चंद्रपूर (Chandrapur) : जातीवाचक शिवीगाड करत एका महीलेला साडी सूटेपर्यंत मारहाण केल्याचा धक्कादायक प्रकार जिल्ह्यात घडला. मात्र, त्यानंतर पोलिसांनी केलेला कारनामा संतापजनक ठरला. पीडित महिलेच्या मुलाला गावातील दोन साक्षिदार आणायला पाठविले. पीडितेच्या अशिक्षितपणाचा फायदा घेत घटनाक्रमानुसार चुकीची तक्रार दाखल केली अन् त्यावर पीडितेचा अंगठा घेतला. हा प्रकार गावातील महिलांच्या लक्षात येताच त्यांनी एसडीओ कार्यालयात धडक देत आरोपीला तात्काळ अटक करण्याची मागणी लावून धरली.

    पती घरी आला नाही म्हणून पतीला शोधत पीडित ग्रामपंचायत कार्यालयापर्यंत गेली. पती शेकोटी जवळ होते. गावातील सदाशिव गणपत पाल तिथे होता. त्याने पीडितेला लाथाबुक्यांनी मारण्यास सूरवात केली. डोक्यावरील केस धरून ओढले. साडी सूटेपर्यंत मारलं. तिथे उपस्थितांनी पीडितेला मारहाणीपासून वाचवून घरी नेले. हा प्रकार १९ डिसेंबरला घडला.

    पीडितेने राजूरा पोलीस स्टेशन गाठून घडलेल्या प्रकाराची तक्रार नोंदविण्यासाठी गेली असता पोलीसांनी तिच्या मुलाला दोन साक्षिदार आणायला पाठविले. याच वेळेस तिच्या अशिक्षितपणाचा फायदा घेत तक्रारीचा घटनाक्रम बदलला. या गंभीर प्रकाराची नोंद अदखलपात्र असा पोलीसांनी केला असल्याचा आरोप पीडितेने केला आहे .कार्यवाही करण्यास पोलीस बगल देत असल्याचे गावातील महिलांचा लक्षात येताच गावातील ५०पेक्षा अधिक महिला २१ डिसेंबरला एसडीओ कार्यालयात धडकल्या.

    जातीवाचक शिविगाड, विनयभंगाचा गुन्हा तात्काळ दाखल करून आरोपीला अटक करण्याची मागणी केली. दरम्यान, यावर सध्या चौकशी सूरू आहे. चौकशीअंती कार्यवाही करण्यात येईल असे राजूराचे ठाणेदार चंद्रशेखर बहाद्दूरे यांनी सांगितले.