रविकांत तुपकर यांच्या गाडीला दुचाकीची धडक, दोन जण गंभीर जखमी

रविकांत तुपकर आपल्या सहकाऱ्यांसोबत मुंबईला निघाले होते. बेराळा फाट्याजवळ भरधाव जात असलेल्या त्यांच्या वाहनासमोर मोटरसायकल घेऊन अचानक दोन युवक रस्ता क्रॉस करताना समोर आले. मोटर सायकलचा वेग खूप जास्त असल्याने मोटर सायकल नियंत्रित करण्यात चालकांना अपयश आले. परिणामी दोन्ही वाहनांची जोरदार धडक झाली.

    बुलडाणा (Buldana) : स्वाभिमानी शेतकरी संघटनेचे नेते रविकांत तुपकर (Ravikant Tupkar’s Car Accident) यांच्या इनोव्हा गाडीला दुचाकी धडकून अपघात झाला आहे. चिखली तालुक्यातील बेराळा फाट्याजवळ काल रात्री साडेनऊ वाजण्याच्या दरम्यान ही घटना घडली. अपघातात दुचाकीवरील दोन जण गंभीर जखमी झाले आहेत. सोळंकी व तुषार परिहार अशी जखमींची नावे आहेत.

    स्वाभिमानी शेतकरी संघटनेचे नेते रविकांत तुपकर आपल्या सहकाऱ्यांसोबत मुंबईला निघाले होते. बेराळा फाट्याजवळ भरधाव जात असलेल्या त्यांच्या वाहनासमोर मोटरसायकल घेऊन अचानक दोन युवक रस्ता क्रॉस करताना समोर आले. मोटर सायकलचा वेग खूप जास्त असल्याने मोटर सायकल नियंत्रित करण्यात चालकांना अपयश आले. परिणामी दोन्ही वाहनांची जोरदार धडक झाली. त्यात दुचाकीवर बसलेल्या दोन्ही युवकांना बराच मार लागला. रविकांत तुपकर यांच्या वाहनाचा वेगही जास्त होता तर मोटरसायकल चालवणारा युवक हा नवशिक्या ड्रायव्हर होता. समोरासमोर वाहन पाहून त्याचे गाडीवरील नियंत्रण सुटले आणि ही घटना घडली.

    तुपकर यांच्या गाडीचे खूप नुकसान झाले, पण ते आणि त्यांचा ड्रायव्हर सुरक्षित आहेत. विशेष म्हणजे तुपकरांनी स्वतः या दोन्ही जखमींना तात्काळ चिखली येथे उपचारासाठी आणले आणि तेथून औरंगाबादला पुढील उपचारासाठी घेऊन गेले. तुपकर यांच्याकडे सौरभ सावजी यांची गाडी आहे.

    सोयाबीन, कापूस उत्पादकांच्या मागण्यांसाठी तुपकर यांनी अलीकडंच अन्नत्याग आंदोलन केलं होतं. त्यामुळं सध्या ते चर्चेत आहेत. शेतकऱ्यांच्या मागण्यांवर सकरात्मक तोडगा काढण्याचं आश्वासन उपमुख्यमंत्री अजित पवार यांनी दिल्यानंतर तुपकर यांनी आंदोलन मागे घेतलं आहे. याच संदर्भात चर्चा करण्यासाठी बुधवारी त्यांची अजित पवार यांच्यासोबत बैठक होणार आहे. त्या बैठकीसाठी ते मुंबईला निघाले होते. त्याच दरम्यान वाटेत हा अपघात झाला.