Nashikदिंडाेरीत साकारणार राज्यातील पहिला आदिवासी औद्योगिक समूह

नाशिक : महाराष्ट्रातील पहिला आदिवासी औद्योगिक समूह दिंडोरीत तालुक्यातील जांबुटके परिसरात होणार असल्याची घाेषणा अर्थमंत्री अजित पवार यांनी आज अर्थसंकल्पात केली.

हा प्रस्तावित आदिवासी औद्योगिक समूह ही नाविन्यपूर्ण संकल्पना असून आदिवासी उद्योजकांना एका ठिकाणी सुविधा उपलब्ध करून आदिवासी समाजात उद्योजकता विकास घडवून आणणे हा मुख्य उद्देश आहे. आदिवासी उद्योजकांना उद्याेगांकरीता रोड, वीज, पाणी, रस्ते यांची उपलब्धता करण्यासोबत मोठे, मध्यम आणि लहान उद्याेग एकाच ठिकाणी विकसित करण्यात येतील.

आदिवासी युवकांना रोजगार उपलब्धीतून कौशल्य विकास साध्य करणे या उद्देशाने अायटीसीची निर्माती करण्यात येणार आहे. नाशिक जिल्ह्यातील दिंडोरी तालुका मुख्य बाजारपेठेपासून जवळ आणि इतर आदिवासी तालुक्याच्या मध्यवर्ती ठिकाणी आहे. रस्ते आणि पाणी यांची उपलब्धता यांचा विचार करता दिंडोरी तालुक्यात आदिवासी औद्योगिक समूह प्रस्तावित करण्यात आले आहे.

दिंडोरी तालुक्यातील टोमॅटो, द्राक्ष, कांदा व भाजीपाला पिकांसोबत, तांदूळ, नागली, खुरासणी, वरई ही महत्वाची पिके असून, यावरील विविध प्रक्रिया उद्योगांची उभारणी करणे शक्य होईल. दिंडोरी तालुक्यात परनॉड रिकॉर्ड, गोदरेज, यू बी बेव्हरेज, वरून अॅग्रो, सहयाद्री अॅग्रो, सूला, सिग्राम, एव्हरेस्ट हे उद्याेग असून उद्याेगांकरीता पोषक वातावरण असल्याने नाशिक जिल्हा मुख्यालयापासून २३ किमी अंतरावर पेठ, गुजरात राज्य मार्गावरील जांबूटके शिवारात प्रकल्प प्रस्तावित आहे.