महिला सिंघमला जीवे मारण्याचा प्लॅन, २ भावांनी मिळून ट्रॅकर मागवला आणि…

भंडारा वनपरिक्षेत्रात येणाऱ्या मांडवी नियत क्षेत्रातील वडेगाव बीटातील बेलगाव येथील वैनगंगा नदी पात्रालगत असलेल्या वन विभागाच्या गट क्रमांक १/२ मधून रेती तस्कर मोठ्या प्रमाणात रेतीची तस्करी करीत आहे, त्याची माहिती परिसरातील शेतकऱ्यांनी वडेगावच्या महिला वनरक्षक जयश्री राजगिरे यांना दिली.

    भंडारा (Bhandara) : भंडारा वनविभागाच्या हद्दीतून होणारी रेती तस्करी थांबविण्याचा प्रयत्न करणाऱ्या महिला सिंघम वनरक्षकावरच रेती तस्करांनी हल्ला करीत त्यांना ट्रॅक्टरने चिरडून जीवे मारण्याचा प्रयत्न केल्याची घटना भंडारा वनपरिक्षेत्रातील वडेगाव (रीठी) येथे घडली. यामुळे वन कर्मचाऱ्यांमध्ये मोठी खळबळ उडाली आहे. वडेगावच्या पीडित महिला वनरक्षक जयश्री राजगिरे यांच्या तक्रारीवरून रेती तस्करी करणाऱ्या दोन भावावर गुन्हा दाखल करण्यात आला आहे.

    भंडारा वनपरिक्षेत्रात येणाऱ्या मांडवी नियत क्षेत्रातील वडेगाव बीटातील बेलगाव येथील वैनगंगा नदी पात्रालगत असलेल्या वन विभागाच्या गट क्रमांक १/२ मधून रेती तस्कर मोठ्या प्रमाणात रेतीची तस्करी करीत आहे, त्याची माहिती परिसरातील शेतकऱ्यांनी वडेगावच्या महिला वनरक्षक जयश्री राजगिरे यांना दिली. या माहितीवरून जयश्री राजगिरे यांनी बेलगाव ग्रामपंचायतचे सरपंच रीना तुमसरे उपसरपंच मनोज वडतकर, तंटामुक्त समिती अध्यक्ष लक्ष्मण केवट यांच्यासह ग्रामपंचायत सदस्यांसह ग्रामपंचायतमध्ये रेती तस्करीवर आळा घालण्या संदर्भात बुधवारी बैठक घेतली.

    यानंतर गुरुवारी पहाटे ४ वाजताच्या सुमारास वनरक्षक जयश्री राजगिरे या बेलगाव ग्रामपंचायतच्या सर्व पदाधिकाऱ्यांसह सापळा रचून रेती तस्करी होत असलेल्या ठिकाणावर एका ट्रॅक्टरमध्ये बसून पोहोचल्या. यावेळी तेथून जाणाऱ्या दोन ट्रॅक्टरला त्यांनी अडविले, त्यातील एका ट्रॅक्टरने वनरक्षक जयश्री राजगिरे यांच्यासह ग्रामपंचायत पदाधिकाऱ्यांवर ट्रॅक्टर चालवून त्यांना चिरडण्याचा प्रयत्न केला. मात्र, समयसूचकता दाखवीत महिला वनरक्षक जयश्री राजगिरेसह ग्रामपंचायतचे पदाधिकारी ट्रॅक्टरच्या वाटेतून बाजूला झाल्याने मोठा अनर्थ टळला.

    दरम्यान, दुसरा ट्रॅक्टर (क्रमांक एमएच ३६ एल ५९७६ ) हा पकडण्यात वनरक्षक जयश्री राजगिरेसह ग्रामपंचायत पदाधिकाऱ्यांना यश आले. याप्रकरणी वन विभागाच्या वतीने कारधा पोलीस ठाण्यात तक्रार दाखल करण्यात आली. ह्या प्रकरणी दोन भावांविरुद्ध गुन्हा दाखल करण्यात आला आहे. मंगेश शालिक निंबारते (३५) आणि शैलेश शालीक निंबारते (३२) रा. मंहनगाव या दोन सख्ख्या भावांविरुद्ध कारणा पोलिसात भादंवी २५३,३७९, ५११, ३४ कलमान्वये गुन्हा दाखल करण्यात आला आहे.