अखेर कुस्तीपटूंचा संप मागे; क्रीडा मंत्र्यांनी आश्वासन दिल्यानंतर निर्णय,चौकशीसाठी समिती स्थापना

कुस्तीपटू विनेश फोगट, बंजराग पुनिया, साक्षी मलिक आणि रवी दहिया यांच्यासह इतर कुस्तीपटूंनी केंद्रीय क्रीडा मंत्री अनुराग ठाकूर यांच्याशी झालेल्या चर्चेच्या दुसऱ्या फेरीनंतर आपला संप मागे घेण्याचा निर्णय घेण्यात आला.

    नवी दिल्ली : गेल्या काही दिवसांपासून कुस्तीपटूंच्या आंदोलनाने देशभरात खळबळ माजवली होती. कुस्तीगीर संघटनेचे विद्यमान अध्यक्ष बृजभूषण शरण सिंह (Brij Bhushan Sharan Singh) यांच्यावर आरोप करत कुस्तीपटुंनी आंदोलन सुरु केल्याने क्रिडाविश्वात एकच खळबळ उडाली होती. अनेक आरोप प्रत्यारोपानंतर काल अखेर रात्री उशिरा हे आंदोलन मागे घेण्यात आलं. रात्री उशिरापर्यंत केंद्रीय क्रीडामंत्री अनुराग ठाकूर (Anurag Thakur) आणि कुस्तीपटूंमध्ये बैठक सुरु होती. या बैठकीत क्रीडा मंत्र्यांनी आश्वासन दिल्यानंतर कुस्तीपटूंनी आंदोलन मागे घेण्याचा निर्णय घेतला.

    समिती स्थापना

    विनेश फोगट, बजरंग पुनिया, साक्षी मलिक यांनी बृजभूषण शरण सिंह यांच्यावर अनेक आरोप करत आंदोलनाच हत्यार उपसलं होतं. या आरोपांसदर्भात चौकशी करण्यासाठी एका समितीची स्थापना करण्यात आली आहे. ही समिती चार आठवड्यांतच आपला अहवाल सादर करणार आहे. महत्त्वाची बाब म्हणजे, जोपर्यंत कुस्तीपटूंकडून करण्यात आलेल्या आरोपांची चौकशी पूर्ण होत नाही, तोपर्यंत कुस्ती संघटनेचं कामही हिच समिती पाहणार आहे. त्याचप्रमाणे, कुस्तीपटूंनी ज्यांच्यावर आरोपांची तोफ डागली आहे, ते कुस्तीगीर संघटनेचे विद्यमान अध्यक्ष बृजभूषण शरण सिंह (Brij Bhushan Sharan Singh) तपास पूर्ण होईपर्यंत संघटनेच्या कामापासून दूर राहतील आणि समितीला तपासात पूर्णपणे सहकार्य करतील. असे निर्देश देण्यात आले आहे.

    आज चौकशी समितीतील सदस्यांची घोषणा होणार

    केंद्रीय क्रीडा मंत्री अनुराग ठाकूर यांनी कुस्तीपटूंसोबत केलेल्या मॅरेथॉन बैठकीनंतर माध्यमांशी बोलताना सांगितलं की, “या प्रकरणाचा तपास करण्यासाठी एक देखरेख समिती स्थापन करण्याचा निर्णय घेण्यात आला आहे. या समितीतील चौकशी अधिकाऱ्यांच्या नावांची घोषणा आज केली जाईल. तसेच, समिती चार आठवड्यांत तपास पूर्ण करेल. समिती WFI आणि तिच्या अध्यक्षांवरील आर्थिक किंवा लैंगिक छळाच्या सर्व आरोपांची गांभीर्याने चौकशी करेल.