दोन डोस घेतलेल्यांना ओमायक्रॉनचा धोका कमी; लसीकरणाचा वेग वाढविण्याची गरज

करोना लशीचे दोन्ही डोस झालेल्या नागरिकांना ओमायक्रॉनचा धोका कमी असल्याचा दावा टास्क फोर्सने केला आहे. त्यामुळे लसीकरणाचा वेग वाढविण्याची गरज व्यक्त होत आहे. शहरात पहिला डोस घेणाऱ्यांची संख्या शंभर टक्के पूर्ण झाली असून, ग्रामीण भागातील टक्केवारी ९० टक्क्यांपर्यंत पोहोचली आहे.

    नागपूर (Nagpur) : करोना लशीचे दोन्ही डोस झालेल्या नागरिकांना ओमायक्रॉनचा धोका कमी असल्याचा दावा टास्क फोर्सने केला आहे. त्यामुळे लसीकरणाचा वेग वाढविण्याची गरज व्यक्त होत आहे.

    करोना लशीचे दोन्ही डोस झालेल्या नागरिकांना ओमायक्रॉनचा धोका कमी असल्याचा दावा टास्क फोर्सने केला आहे. त्यामुळे लसीकरणाचा वेग वाढविण्याची गरज व्यक्त होत आहे. शहरात पहिला डोस घेणाऱ्यांची संख्या शंभर टक्के पूर्ण झाली असून, ग्रामीण भागातील टक्केवारी ९० टक्क्यांपर्यंत पोहोचली आहे. येत्या दहा दिवसांत लसीकरण पूर्ण करावे, असे निर्देश पालकमंत्री डॉ. नितीन राऊत यांनी सोमवारी प्रशासनाला दिले.

    विभागीय आयुक्त कार्यालयाच्या सभागृहात ओमायक्रॉन विषाणूपासून असलेल्या संभाव्य धोक्याच्या पातळीवर वरिष्ठ अधिकारी, शासकीय वैद्यकीय महाविद्यालयाचे अधिष्ठाता, विभागीय टास्क फोर्सचे प्रतिनिधी यांची संयुक्त बैठक पालकमंत्र्यांच्या अध्यक्षतेखाली झाली. यावेळी विभागीय आयुक्त प्राजक्ता लवंगारे-वर्मा, पोलिस आयुक्त अमितेश कुमार, महापालिका आयुक्त राधाकृष्णन बी., जिल्हाधिकारी आर. विमला, जिल्हा पोलिस अधीक्षक विजय मगर, मुख्य कार्यकारी अधिकारी योगेश कुंभेजकर, शासकीय वैद्यकीय महाविद्यालयाचे अधिष्ठाता डॉ. सुधीर गुप्ता, मेयोच्या डॉ. तायडे, आरोग्य उपसंचालक संजय जैस्वाल, टास्क फोर्सचे डॉ. मिलिंद भुरसुंडी, डॉ. सरनाईक, अतिरिक्त आयुक्त राम जोशी आदी उपस्थित होते.

    उघडा स्वतंत्र कक्ष
    ओमायक्रॉन विषाणूचा संभाव्य धोका लक्षात घेवून शासकीय वैद्यकीय महाविद्यालय तसेच इंदिरा गांधी शासकीय वैद्यकीय महाविद्यालय (मेयो) येथे ऑक्सिजनसह सर्व सुविधा असलेला स्वतंत्र कक्ष सुरू करण्याच्या सूचना यावेळी डॉ. राऊत यांनी केल्या. लसीकरणासाठी ग्रामीण भागातील सरपंच, स्थानिक स्वराज्य संस्थांचे पदाधिकारी यांची मदत घ्यावी, असेही त्यांनी सांगितले.

    विदेशातून आले ७५० नागरिक
    ओमायक्रॉन व्हेरिएंटचे रुग्ण इंग्लंडमध्ये वाढत आहेत. तसेच देशात व राज्यातही हे रुग्ण आढळल्यामुळे विदेशातून येणाऱ्या प्रत्येक नागरिकांची कोव्हिड तपासणी अनिवार्य करण्यात आली आहे. नागपूर शहरात संभाव्य रुग्णांची नोंद झाली असून या पार्श्वभूमीवर आरोग्य यंत्रणा अधिक सक्षम करणे आवश्यक आहे. विदेशातून शहरात सुमारे ७५० प्रवासी दाखल झाले असून या सर्वांचा शोध घेऊन महापालिकेतर्फे कोव्हिड तपासणी सक्तीची करावी, अशा सूचनाही यावेळी करण्यात आल्या.