वाहतूक पोलिसाला बोनेटवर ५० फूट फरफटत नेले; रामदासपेठेतील कॅनल रोडवरील प्रसंग

सागर हे कारच्या बोनेटवर चढले. चालकाने सुमारे ५० फुटापर्यंत त्यांना फरफटत नेले. नागरिक जमा झाल्याने चालकाने कार थांबवली. वाहतूक विस्कळीत झाली. घटनेची माहिती मिळताच सीताबर्डी पोलिसांचा ताफा तेथे पोहोचला. वाहतूक पोलिस व चालकाला कारसह पोलिस स्टेशनमध्ये आणले.

    नागपूर (Nagpur) : नियमभंग करणाऱ्या चालकांविरुद्ध कारवाई सुरू असताना एका कारचालकाने वाहतूक शाखेच्या पोलिसाला ५० फुटांपर्यंत फरफटत नेले. ही खळबळजनक घटना अलीकडेच दुपारी २ वाजताच्या सुमारास रामदासपेठेतील कॅनल रोडवर घडली. या घटनेने परिसरातील वाहतूक काही काळ विस्कळीत झाली होती. हरीश शंकर भुजाडे (रा. इतवारी) असे कारचालकाचे नाव आहे.

    शनिवारी दुपारी २ वाजताच्या सुमारास हरीश हे एमएच-३१-सीपी-९५९४ या क्रमांकाच्या कारने जात होते. कारमध्ये दोन महिला होत्या. त्यापैकी एकीला मधुमेहाचा आजार होता. हरीश हे तिला डॉक्टरकडे घेऊन जात होते. मॉरिस कॉलेज टी पॉइंट चौकात हरीश यांनी सिग्नल तोडला. याबाबत वाहतूक पोलिसांना माहिती मिळाली. वाहतूक शाखेचे पोलिस शिपाई सागर हिवराळे व त्यांच्या सहकाऱ्यांनी कारचा पाठलाग केला. सिग्नल बंद असल्याने कार पंचशील चौकात थांबवली. याचवेळी सागर तेथे पोहोचले. ते कारचे छायाचित्र काढायला लागले. सिग्नल सुरू झाला. हरीश यांनी कारचा वेग वाढविला. सागर यांनी हरीश यांना कार थांबविण्याचा इशारा केला. मात्र, हरीश यांनी कार थांबविली नाही.

    सागर हे कारच्या बोनेटवर चढले. चालकाने सुमारे ५० फुटापर्यंत त्यांना फरफटत नेले. नागरिक जमा झाल्याने चालकाने कार थांबवली. वाहतूक विस्कळीत झाली. घटनेची माहिती मिळताच सीताबर्डी पोलिसांचा ताफा तेथे पोहोचला. वाहतूक पोलिस व चालकाला कारसह पोलिस स्टेशनमध्ये आणले.

    दरम्यान, या घटनेची चित्रफित शनिवारी सायंकाळी व्हॉट्सअॅप समूहांवरही व्हायरल झाली. कारमध्ये मधुमेहाचा रुग्ण होता. चालक त्याला डॉक्टरकडे घेऊन जात होता. वाहतूक पोलिसांनी कारचालकाविरुद्ध चालान कारवाई केली आहे. घडलेल्या प्रकाराबाबत चालकाने पोलिस कर्मचाऱ्याची लिखित माफी मागितल्याने प्रकरण निवळल्याचे सीताबर्डी पोलिसांनी सांगितले.

    सक्करदऱ्यातील घटनेला उजाळा
    नोव्हेंबर २०२०मध्ये सक्करदरा चौकात असाच प्रकार घडला होता. प्रेयसीला घेऊन जाणाऱ्या कारचालकाने सक्करदरा वाहतूक शाखेचे हेडकॉन्स्टेबल अमोल भोजराज चिदमवार (वय ३९, रा. रामकृष्णनगर दिघोरी) यांना सुमारे ५०० फुटापर्यंत फरफटत नेले होते. या घटनेत अमोल हे जखमी झाले होते. याप्रकरणी सक्करदरा पोलिसांनी कारचालक आकाश व त्याच्या प्रेयसीविरुद्ध गुन्हा दाखल करून दोघांना अटक केली होती. त्यांची एक दिवस पोलिस कोठडीही घेण्यात आली होती. शनिवारी कॅनल रोडवर घडलेल्या घटनेने सक्करदऱ्यातील घटनेलाही उजळाला मिळाला.