कोरोना काळात भरीव कामगिरी करणाऱ्या आशा सेविका आणि अंगणावाडी सेविकांच्या मागण्यांची सरकारने या अर्थसंकल्पात दखल घेतली असून त्यांना विविध लाभ आणि फायदे देण्यात येणार आहेत. अशी घोषणा राज्याचे उपमुख्यमंत्री आणि अर्थमंत्री देवेंद्र फडणवीस यांनी केली.
मुंबई : आशा स्वयंसेविकांचे मानधन 3500 वरुन 5000 रुपये करण्यात आले असून गटप्रवर्तकांचे मानधन 4700 वरुन 6200 रुपये करण्यात आले आहे. अंगणवाडी सेविकांचे मानधन 8325 वरुन 10,000 रुपये तर मिनी अंगणवाडी सेविकांचे मानधन 5975 वरुन 7200 रुपये अशी वाढ करण्यात आली आहे.
अंगणवाडी मदतनिसांचे मानधन 4425 वरुन 5500 रुपये, अंगणवाडी, मिनी अंगणवाडी सेविका, मदतनीसांची 20,000 पदे भरणार असल्याची माहितीही फडणवीस यांनी दिली. अंगणवाड्यांमार्फत घरपोच आहार पुरवठ्यासाठी साखळी व्यवस्थापन प्रणाली अंमलात आणणार असल्याचेही त्यांनी यावेळी सांगितले.
