चंद्रपूर जिल्ह्यात डेंग्यूचा कहर; जुलैत १०५ रुग्णांचा मृत्यू

जानेवारीपासून जिल्ह्यात डेंग्यूचे रुग्ण आढळत आहेत. चालू वर्षात आतापर्यंत ११४ रुग्ण आढळून आले आहेत. जुलै महिन्यात प्रादुर्भाव मोठ्या प्रमाणात वाढला आहे. चंद्रपूर जिल्ह्यातील ग्रामीण भागातील ४६ तर ५९ रुग्ण महापालिका क्षेत्रात आढळले आहेत.

    चंद्रपूर (Chandrapur). कोरोना संसर्गापासून दिलासा मिळण्याचे चित्र तयार होत असतानाच चंद्रपुरात एकट्या जुलै महिन्यात १०५ डेंग्यूचे रुग्ण (dengue patients) आढळून आले आहेत. वरोरा तालुक्यात (Varora Taluka) एका युवतीचा मृत्यू झाला. महानगरपालिकेच्या क्षेत्रातील (municipal area) महिनाभरातील रुग्णसंख्या ५९ इतकी आहे.

    जानेवारीपासून जिल्ह्यात डेंग्यूचे रुग्ण आढळत आहेत. चालू वर्षात आतापर्यंत ११४ रुग्ण आढळून आले आहेत. जुलै महिन्यात प्रादुर्भाव मोठ्या प्रमाणात वाढला आहे. चंद्रपूर जिल्ह्यातील ग्रामीण भागातील ४६ तर ५९ रुग्ण महापालिका क्षेत्रात आढळले आहेत. यातच वरोरा तालुक्यातील उखार्डा येथील प्रीती उरकुडे या तरुणीचा सेवाग्राम येथे उपचारादरम्यान मृत्यू झाल्याची माहिती आहे.

    चंद्रपूर जिल्ह्यात एकूण ४११ नमुने चालू वर्षात तपासण्यात आले आहेत. यात जुलै महिन्यात वरोरा तालुक्यात ११, गोंडपिपरी नऊ, भद्रावती आठ; बल्लारपूर, चिमूर व पोंभुर्णा तालुक्यातील प्रत्येकी चार, कोरपना तीन, नागभीड, मूल व चंद्रपूर तालुक्यातील प्रत्येकी एकाचा समावेश आहे.

    सध्या पावसाचे दिवस सुरू असल्याने डेंग्यूचा प्रभाव कमी करण्यासाठी चंद्रपूर महानगरपालिकेच्या स्वच्छता विभागामार्फत किटकनाशक औषधीची फवारणी नियमित केली जात आहे. जुलै ते ऑक्टोबरदरम्यान डेंग्यू सर्वाधिक पसरतो. या ऋतुमध्ये डासांची पैदास वाढण्याची शक्यता असते, असे वैद्यकीय सूत्रांनी बोलताना स्पष्ट केले.

    स्वतंत्र कक्ष उभारण्यासाठी पत्र
    शहरातील विविध भागात खोल खड्डे व खुली गटारे असल्यामुळे साचलेल्या पाण्यात डासांची पैदास वाढली आहे. यात गांभीर्याची बाब म्हणजे याच पाण्यात डेंग्यूच्या डासांचीही पैदास होत असल्याने संपूर्ण जिल्ह्यात डेंगूच्या आजाराच्या रुग्णांमध्ये लक्षणीय वाढ झाली आहे. या आजारावरील उपचाराचा खर्च महागडा आहे. सर्वसामान्यांच्या आवाक्याबाहेरचा आहे. त्यामुळे सदर आजारांचे रुग्ण शासकीय रुग्णालयात दाखल होत आहे.

    याचा परिणाम येथील आरोग्यसेवेवर पडत आहे. सदर रुग्णांना उत्तम उपचार मिळावेत म्हणून डेंग्यू आजाराच्या उपचारासाठी स्वतंत्र कक्ष तयार करण्यात यावा, अशी सूचना पत्राच्या माध्यमातून शासकीय वैद्यकीय महाविद्यालयाचे अधिष्ठाता डॉ. अविनाश टेकाडे यांच्याकडे आमदार किशोर जोरगेवार यांनी केली आहे.

    जुलै महिन्यातील रुग्ण
    – चंद्रपूर शहर     :   ५९
    – ग्रामीण भाग    :   ४६
    ————————
    एकूण              :  १०५