Rahul should separate Gandhi-Bachchan family? Claim in the book of the former MP

राजीव गांधी पंतप्रधान असताना ज्या ज्या वेळी परदेशातील ज्येष्ठ नेते भारतात येत त्या त्या वेळी अमिताभ बच्चन यांना विशेष निमंत्रण दिले जात असे. राजीव हे परदेशी पाहुण्यांना बच्चन यांची ओळख खासदार म्हणून नव्हे तर अभिनेता म्हणून करून देत. स्वागत समारंभादरम्यान राजीव हे अमिताभ यांना 'मेरे अंगने मे तुम्हारा क्या काम है...' या गाजलेल्या गाण्यावर नाच करायला सांगत. त्यावर नाईलाजाने बच्चन यांना नाच करावाचा लागत असे, असा दावा भारतीय यांनी केला आहे.

    दिल्ली : माजी पंतप्रधान राजीव गांधी आणि बॉलिवूड अभिनेते अमिताभ बच्चन यांच्यात घनिष्ट मैत्री होती. मात्र, राजीव यांच्या निधनानंतर गांधी आणि बच्चन कुटुंबीयांमध्ये दुरावा निर्माण झाला. असे का घडले, यावर दोन्ही कुटुंबीयांनी कधीच भाष्य केले नाही. मात्र, लंडनमध्ये शिकत असलेल्या राहुल गांधी यांची फी भरण्यावरून सोनिया गांधी आणि अमिताभ बच्बन यांचे संबंध बिघडल्याचा दावा एका पुस्तकात करण्यात आला आहे.

    ज्येष्ठ पत्रकार आणि माजी खासदार संतोष भारतीय यांचे ‘व्ही. पी. सिंह, चंद्रशेखर, सोनिया गांधी आणि मी’ हे पुस्तक नुकतेच प्रकाशित झाले आहे. या पुस्तकात नव्वदच्या दशकातील भारतीय राजकारणातील अनेक घटनांची उकल करण्यात आली आहे. भारतीय यांनी पुस्तकात लिहील्याप्रमाणे, राजीव गांधी यांच्या हत्येनंतर लंडनमध्ये असलेल्या राहुल यांच्या शिक्षणाबाबत सोनियांची चिंता वाढली होती.

    एकदा सोनिया यांनी आपले हे विचार अमिताभ यांच्यापुढे मांडले. त्यावर, पैसे ललित सुरी आणि सतीश शर्मा यांनी हडपले, माझ्याकडे आता पैसे नाहीत, पण मी काही तरी व्यवस्था करतो, असे उत्तर अमिताभ यांनी सोनियांना दिले. दोन दिवसांनी बच्चन यांनी सोनियांना एक हजार डॉलर्सचा (सुमारे 74 हजार 500 रूपये) चेक आणून दिला. मात्र, सोनिया यांनी ते पैसे घेतले नाहीत. देशातील ही दोन प्रतिष्ठित घराणी एकमेकांपासून दूर जाण्यास हीच घटना कारणीभूत ठरली.

    इंदिरा गांधींचाही जिव्हाळा

    सुरी आणि शर्मा हे दोघेही काँग्रेसचे नेते होते. राजीव यांच्या निकटवर्तीयांमध्ये त्यांचा समावेश होता. त्यावेळी बच्चन, शर्मा आणि सुरी या तिघांनी तांदळाचा व्यापार सुरू केला होता. राजीव यांच्याभोवती गांधी घराण्याचे वलय असल्यामुळे त्यांचे नाव थेट या व्यवसायाशी जोडले गेले नाही. आणखी काही लोकांचीही या व्यवसायात भागिदारी होती. मात्र, त्यांची नावे कधीच समोर आली नाहीत. सोनिया यांनी अमिताभ यांच्याकडे मागितलेल्या मदतीला या व्यवसायाचासुद्धा संदर्भ असू शकतो. अमिताभ बच्चन यांची राजीव यांच्यासोबतच संजय गांधी यांच्याशीही विशेष मैत्री होती. बच्चन यांच्या आई तेजी यांचेही इंदिरा गांधींशी जिव्हाळ्याचे संबंध होते. तेजी बच्चन या अधूनमधून इंदिरा यांना भेटायला जात असत आणि इंदिरासुद्धा त्यांचे तितक्याच आपुलकीने स्वागत करीत असत. यातूनच दोन्ही कुटुंब एकमेकांच्या अधिक जवळ आले, असे भारतीय यांनी म्हटले आहे.

    विदेशी पाहुणे आणि बच्चन यांचा नाच

    राजीव गांधी पंतप्रधान असताना ज्या ज्या वेळी परदेशातील ज्येष्ठ नेते भारतात येत त्या त्या वेळी अमिताभ बच्चन यांना विशेष निमंत्रण दिले जात असे. राजीव हे परदेशी पाहुण्यांना बच्चन यांची ओळख खासदार म्हणून नव्हे तर अभिनेता म्हणून करून देत. स्वागत समारंभादरम्यान राजीव हे अमिताभ यांना ‘मेरे अंगने मे तुम्हारा क्या काम है…’ या गाजलेल्या गाण्यावर नाच करायला सांगत. त्यावर नाईलाजाने बच्चन यांना नाच करावाचा लागत असे, असा दावा भारतीय यांनी केला आहे.