आलियाला दिलासा, मानहानीच्या फौजदारी दावावरील सन्मसला न्यायालयाची अंतरिम स्थगिती!

आपल्या चित्रपटांमुळे नेहमीच वादाच्या भोवऱ्यात अडकणारे प्रसिद्ध बॉलिवूड निर्माता आणि दिग्दर्शक संजय लीला भन्साळी यांचा 'गंगूबाई काठियावाडी’ हा चित्रपट यापूर्वी सप्टेंबर २०२० मध्ये प्रदर्शित होणार होता.

    ‘गंगूबाई काठियावाडी’ चित्रपट निर्माते आणि अभिनेत्री आलिया भट्टविरोधात दाखल करण्यात आलेल्या मानहानीच्या फौजदारी दाव्यावरून दंडाधिकारी न्यायालयाने सन्मस बजावले होते. त्याला मुंबई उच्च न्यायालयाने नुकतीच अंतरिम स्थगिती दिली असून न्यायालयाच्या या निर्णयामुळे निर्माते आणि आलियाला दिलासा मिळाला आहे.

    ‘गंगूबाई काठियावाडी’ हा चित्रपट हुसैन जैदी यांच्या ‘द माफिया क्वीन ऑफ मुंबई’ या पुस्तकावर आधारित आहे. त्या पुस्तकातील काही भाग बदनामीकारक असून गगुबांईंची प्रतिष्ठा डागाळली आहे. त्यामुळे गंगुबाईंच्या गोपनीयतेच्या अधिकाराचे उल्लंघन केले आहे. असे सांगत गंगुबाई काठियावाडी यांचा दत्तक मुलगा बाबूजी रावजी शहा यांनी मुंबईतील महानगर दंडाधिकाऱ्यांकडे या चित्रपटाच्या निर्माते आणि अभिनेत्री आलिया भट्टविरोधात मानहानीचा फौजदारी दावा केला आहे. त्याची दखल घेत महानगर दंडाधिकाऱ्यांनी चित्रपट निर्माते आणि अलियाला समन्स जारी केले होते. त्याला भन्साळी प्रॉडक्शन प्रायव्हेट लिमिटेड, संजय लीला भन्साळी आणि आलिया भट्टने उच्च न्यायालयात आव्हान दिले होते. त्यावर नुकतीच न्या. रेवती मोहिते-डेरे यांच्यासमोर सुनावणी पार पडली. तेव्हा, मुंबई शहर दिवाणी न्यायालयाने ‘द माफिया क्वीन ऑफ मुंबई’च्या लेखकांना कादंबरीच्या प्रकाशन, विक्री किंवा पुस्तकावर हक्क निर्माण करण्यापासून कायमस्वरुपी रोखण्यात यावे, अशी मागणी करणारा खटला फेटाळून लावल्याची बाब याचिकाकर्त्यांच्यावतीने अॅड. आबाद पौंडा यांनी न्यायालयाच्या निदर्शनास आणून दिली. त्याची दखल घेत प्रतिवादींना नोटीस बजावत न्यायालयाने पुढील सुनावणीपर्यंत कारवाईला स्थगिती देत सुनावणी ७ सप्टेंबरपर्यंत तहकूब केली.

    चित्रपटाच्या प्रदर्शनाचा मार्ग मोकळा 

    शहा यांनी चित्रपटाच्या प्रदर्शनावर स्थगिती देण्यात यावी आणि हुसैन जैदी या लेखक/प्रकाशकांना गंगूबाईंच्या जीवनावर इतर कोणतीही कथा लिहिण्यापासून रोखण्याचे आदेश देण्यात यावेत, अशी मागणी कऱणारी याचिकाही उच्च न्यायालयात दाखल केली होती. त्यावर न्या. नितीन सांबरे यांच्यासमोर पार पडलेल्या सुनावणीदरम्यान, व्यक्तीच्या मृत्यूसह त्यांच्याविरोधातील (बदनामीकारक) कोणतीही बाबही मृत ठरते. तसेच याचिकाकर्ते (शहा) हे गंगूबाई काठियावाडींचा दत्तक मुलगा आहेत, हे पटवून देण्यास प्रथमदर्शनी अपयशी ठरले असल्याचे निरीक्षण न्यायालयाने नोंदवले आणि शहा यांची मागणी फेटाळून लावली. न्यायालयाच्या निर्णयामुळे चित्रपट प्रदर्शनाचा मार्ग मोकळा झाला आहे.

    आपल्या चित्रपटांमुळे नेहमीच वादाच्या भोवऱ्यात अडकणारे प्रसिद्ध बॉलिवूड निर्माता आणि दिग्दर्शक संजय लीला भन्साळी यांचा ‘गंगूबाई काठियावाडी’ हा चित्रपट यापूर्वी सप्टेंबर २०२० मध्ये प्रदर्शित होणार होता, परंतु कोरोनामुळे तो आता २०२१ मध्ये सिनेमागृहांमध्ये प्रदर्शित होणार आहे.