‘भारूडरत्न आणि बुरगुंडाकार’ निरंजन भाकरे यांचे निधन; बँकांचे अहवाल आपल्या भारुडातून सादर करण्यात होता हातखंडा

भारुडरत्न निरंजन भाकरे यांचं आज शुक्रवारी अल्पशा आजाराने निधन झालं ते ६२ वर्षांचे होते. ‘बये तुला बुरगुंडा होईल गं’ या भारुड सादरीकरणाने ते राज्यभर प्रसिद्ध झाले होते.

    औरंगाबाद: प्रसिद्ध लोककलावंत ‘भारुडरत्न’ निरंजन भाकरे (वय ६२) यांचे शुक्रवारी अल्पशा आजाराने निधन झाले. मागील काही दिवसांपासून त्यांच्यावर खासगी रुग्णालयात उपचार सुरू होते. त्यांच्या पश्चात पत्नी, मुलगा, सून, नातवंडे असा परिवार आहे. ‘बये तुला बुरगुंडा होईल गं’ या भारुड सादरीकरणाने राज्यभर प्रसिद्ध झालेले ज्येष्ठ लोककलावंत निरंजन भाकरे यांचे शुक्रवारी निधन झाले.

    रहिमाबाद (ता. सिल्लोड) येथील भाकरे यांची जडणघडण वारकरी कुटुंबात झाली. भजन व भारुडाचा वारसा वडिलांकडून मिळाला होता. वडिलांचे छत्र लवकर हरपल्याने भाकरे यांना जगण्यासाठी मोठा संघर्ष करावा लागला. १९७२ च्या दुष्काळात त्यांनी कष्टाची कामे केली. नंतरच्या काळात खासगी कंपनीत कामगार होते. लोककलेचे अभ्यासक अशोक परांजपे यांच्या संपर्कात आल्यानंतर भाकरे यांना ‘सोंगी भारुड’ सादरीकरणाची संधी मिळाली. काही वर्षांतच भाकरे नावारुपाला आले. त्यांचे देश-विदेशात कार्यक्रम सादर झाले. बँकांचे वार्षिक अहवाल आपल्या भारुडातून सादरीकरण करण्यात त्यांचा हातखंडा होता.

    ‘व्यसनमुक्ती पहाट’ कार्यक्रमातून चार वर्षे त्यांनी जनजागृती केली. त्यांनी ‘मराठी बाणा’, ‘लोकोत्सव’ कार्यक्रम गाजविले. टीव्ही शो, वेरूळ-अजिंठा महोत्सव, लोकगाथा अशा कार्यक्रमात भाकरे यांचे भारुड सादरीकरण गाजले होते. सोंगी भारुडासाठी भाकरे राज्यभर परिचित झाले होते. त्यांना अनेक महत्त्वाच्या पुरस्कारांनी सन्मानित करण्यात आले होते.

    भाकरे यांनी ९० मीटर कापडाचा पायघोळ तयार केला होता. या पायघोळाचा घेर ७५ मीटर आणि वजन साडेआठ किलो होते. पायघोळ आणि इतर अलंकारांच्या वजनासह तब्बल २० किलोग्रॅम वजनाची वेशभूषा सांभाळत भाकरे यांनी भारुड सादरीकरण केले होते. या विक्रमाची ‘वर्ल्ड अमेझिंग रेकॉर्ड’मध्ये नोंद झाली आहे.

    स्वप्न अपूर्ण राहिले

    लोककला सादरीकरणासह नवीन कलाकार घडविण्यासाठी भाकरे सक्रिय झाले होते. काही संस्थांचे सांस्कृतिक प्रतिनिधी म्हणून ते योगदान देत होते. रहिमाबाद येथे लोककला प्रशिक्षण संस्था सुरू करण्याचे त्यांचे स्वप्न होते. या माध्यमातून लोककला क्षेत्रात योगदान देता येईल, असे त्यांनी सांगितले होते. दुर्देवाने, भाकरे यांचे स्वप्न अपूर्ण राहिले.