आयुष शर्माच्या आगामी चित्रपटाचा टीझर रिलीज, अभिनेता दिसला दमदार भूमिकेत

अभिनेता आयुष शर्माने दसऱ्याच्या दिवशी त्याच्या चाहत्यांना मोठी भेट दिली आहे. त्याच्या आगामी चित्रपटाचा टीझर आज रिलीज झाला आहे. या चित्रपटाचे शीर्षक अद्याप निश्चित झाले नसले तरी आयुष शर्माच्या या प्रोजेक्टला 'AS 03' असे नाव देण्यात आले आहे. या चित्रपटाची कथा आधुनिक पौराणिक साहसावर आधारित आहे. टीझरमध्ये आयुष शर्माचा दमदार लूक पाहायला मिळत आहे.

    टीझरमध्ये आयुष शर्मा हातात तलवार घेतलेला दिसत आहे. तो माणसाचे डोके धडापासून वेगळे करताना दिसतो, नंतर तो स्वत: डोक्यावर मुकुट घातलेला दिसतो. यादरम्यान त्याच्या मागे रावणाची प्रतिमा तयार झालेली दिसते. आयुष शर्माने हा टीझर त्याच्या इंस्टाग्राम अकाउंटवर शेअर केला आहे.

    टीझर शेअर करताना त्याने कॅप्शनमध्ये लिहिले की, ‘काही लोकांसाठी राजा, काही लोकांसाठी राक्षस, काही लोक चांगले, काही लोक वाईट मी कोण आहे? शोधाशोध लवकरच सुरू होईल! हा चित्रपट पुढच्या वर्षी प्रदर्शित होणार आहे. मात्र, त्याची रिलीज डेट अद्याप जाहीर करण्यात आलेली नाही. या चित्रपटाचे दिग्दर्शन रवि वर्मा आणि इम्रान सरधरिया यांनी संयुक्तपणे केले आहे. त्याचा टीझर चाहत्यांसह सेलिब्रिटींनाही खूप आवडला आहे. स्टार्स त्याला शुभेच्छा देत आहेत.