एथनिक जॅकेट ने द्या क्लासी लूक

एक महत्त्वाचे म्हणजे, या जॅकेटला पुढच्या बाजूला बटन्स नसतात, ते पूर्णपणे खुले असतात. त्यामुळे ते कॅरी करणे जरासे मुश्कील ठरते. खरे तर, तुमच्या मुख्य पेहरावाला वेगळा टच देण्याचा या जॅकेटचा हेतू असल्याने त्याला बटन्सचा पर्याय दिला जात नाही.

    जॅकेटच्या फॅशनने (Jacket Fashion) खूप आधीपासून आपला जम बसवला आहे. त्याच्याबरोबरीने इतर कितीही ट्रेंड येवो अथवा जावो, जॅकेटची फॅशन तशीच राहाते. मग त्याचा प्रकार वेस्टर्न असो वा एथनिक (athinic). फक्त त्याच्या पॅटर्नमध्ये बदल होत जातात. सध्या लाँग जॅकेटची फॅशन जबरदस्त लोकप्रिय होताना दिसतेय. यामध्ये पाश्चात्य ड्रेसिंगसाठीचे विविध पर्याय आहेतच; शिवाय पारंपरिक आणि फ्युजनची चलतीही जास्त आहे.

    लग्नसोहळ्यामध्ये हटके काहीतरी
    जीन्सवर शॉर्ट किंवा गुडघ्यापर्यंतचे जॅकेट बऱ्यापैकी घातले जातात. सध्या जास्त ट्रेंडी ठरतंय, ते एथनिक लाँग जॅकेटचा फ्युजन प्रकार. म्हणजे घागरा किंवा अनारकलीवर हे जॅकेट शोभून दिसतातच, त्याचबरोबर टाइट जीन्स, पलाझो, वनपीस किंवा ट्राउझर अशा वेस्टर्न आउटफिटवरही पारंपरिक डिझाइन असलेले जॅकेट भाव खावून जात आहेत. त्यामुळे तुम्हाला पार्टी किंवा एखाद्या शानदार लग्नसोहळ्यामध्ये हटके काहीतरी पेहराव करायचा असेल, तर हे कॉम्बिनेशन नक्की घालून पाहा.

    पॅटर्नमध्ये विरोधाभास नको
    या जॅकेटवर जर्दोसी, बांधणी, कच्छ, स्वरोवस्की, प्रिंट, एम्ब्रॉयडरी अशा विविध पद्धतीची कारागिरी केलेली असते. पूर्ण किंवा स्लिव्हलेस बाह्यांमध्ये याचे पर्याय आहेत. मुख्य पेहरावासोबत विरूद्ध रंगसंगतीमध्ये किंवा फिक्या-गडद रंगांचे मिश्रण करून जॅकेट खरेदी करता येईल. मात्र, जॅकेट आणि मुख्य पेहराव एकमेकांना सुसंगत वाटले पाहिजे. त्यामध्ये रंग, पॅटर्नमध्ये विरोधाभास नको, अन्यथा ‘फॅशन ब्लंडर’ व्हायला वेळ लागणार नाही. शक्यतो सोनेरी, पांढरा, काळा, राखाडी, मोती या रंगामध्ये जॅकेट डिझाइन करून घेतल्यास अनेक प्रकारच्या पेहरावासोबत ते घालता येईल. मल्टीकलर जॅकेट टाळाच. त्यामुळे वॉर्डरोबमध्ये ऐनवेळी मिक्स अँड मॅच करण्यासाठी एखादे एथनिक जॅकेट नक्की ठेवा.

    ओव्हरकोटप्रमाणे वापर
    एक महत्त्वाचे म्हणजे, या जॅकेटला पुढच्या बाजूला बटन्स नसतात, ते पूर्णपणे खुले असतात. त्यामुळे ते कॅरी करणे जरासे मुश्कील ठरते. खरे तर, तुमच्या मुख्य पेहरावाला वेगळा टच देण्याचा या जॅकेटचा हेतू असल्याने त्याला बटन्सचा पर्याय दिला जात नाही. त्याला फिटिंगसाठी योग्य ठिकाणी टक्स आणि कट्स दिले असल्याने ते तुमच्या शरीरयष्टीला तंतोतंत बसतात. ओव्हरकोटप्रमाणे त्याचा वापर केला जातो. जॅकेटच्या पेहरावासोबत कमीत कमी  ॲक्सेसरी घाला. मोकळे केस आणि लांब कानातले किंवा स्टेटमेंट ज्वेलरी यावर छान दिसेल. उंच मुलींना हे ड्रेसिंग छान दिसतं, यामुळे त्यांच्या उंचीची शोभा आणखी वाढते, शिवाय ते लाँग जॅकेट छान कॅरीही करू शकतात.