रेडिमेड हेअरस्टाइलची चलती

आंबाड्याचे वेगवेगळे प्रकार, लो-अप्पर बनचे प्रकार यामध्ये आहेतच; शिवाय क्लिपचा वापर करून बनवलेले कर्ल हेअर, स्ट्रेट हेअर, हेअरबँडला लावलेले मोकळे केस, वेणी असेही काही प्रकार सध्या मुलींचं लक्ष वेधून घेत आहेत.

    मेकअप ही महिलांसाठी एकवेळ सोपी गोष्ट असेल; पण हेअरस्टाइल सगळ्यांनाच जमेल असं नाही. पिनअप करून केस मोकळे सोडण्याची स्टाइल सगळ्याच वेशभूषेवर शोभेल असं नाही. त्यासाठी स्टायलिश हेअरस्टाइल करावीच लागते. प्रत्येकवेळी पार्लरमध्ये जाऊन किंवा हेअरस्टाइलिस्टला हायर करण्याची ऐपत नसते. हे पाहता सध्या बाजारात रेडिमेड हेअरस्टाइलची चलती आहे. या हेअरस्टाइल पारंपरिक आणि पाश्चात्य वेशभूषेवर जाणाऱ्या असल्यानं तरुणींकडूनही त्याला खूप मागणी आहे.

    आंबाड्याचे वेगवेगळे प्रकार, लो-अप्पर बनचे प्रकार यामध्ये आहेतच; शिवाय क्लिपचा वापर करून बनवलेले कर्ल हेअर, स्ट्रेट हेअर, हेअरबँडला लावलेले मोकळे केस, वेणी असेही काही प्रकार सध्या मुलींचं लक्ष वेधून घेत आहेत. केसांच्या मूळ टेक्श्चरचा कंटाळा आला असल्यास ते बांधून वरती कुरळे केस हेअरबँडमध्ये लावण्याची सोयही या रेडिमेड हेअरस्टाइल्सनी दिली आहे. याची किंमत साधारण १०० रुपयांपासून सुरू होते. मागणीनुसार त्याची किंमत एक हजार रुपयांपर्यंतही आहे.

    विशेष म्हणजे, केसांच्या मूळ टेक्श्चर आणि रंगांना मॅच होतील असं वैविध्य यामध्ये आहे. महत्त्वाचं हे, की या दोन्ही गोष्टी जुळल्या तरच ती हेअरस्टाइल खरेदी करा. तरच त्यात खरी मजा आहे.