आश्चर्यकारक आहेत भिजवलेले शेंगदाणे खाण्याचे फायदे; हृदयरोगाची भीती वाटणाऱ्यांनी नक्की वाचावे

यबरमुळे शरीराची पचन प्रक्रिया सुरळीत सुरू राहते. पचनसंस्थेसाठी हा पोषक घटक अतिशय महत्त्वाचा आहे. यामुळे आपल्या आहारामध्ये नियमित स्वरुपात फायबरयुक्त पदार्थांचा समावेश करावा.

    शेंगदाण्यांचा आपण वेगवेगळ्या पाककृतींमध्ये समावेश करतो. ज्यामुळे जेवणाची चव वाढते. शेंगदाण्यांमध्ये प्रोटीन, तेल आणि फायबरचे भरपूर प्रमाण आहे. नियमित योग्य प्रमाणात शेंगदाणे खाल्ले तर त्यापासून तुम्हाला कित्येक आरोग्यदायी लाभ मिळतील. शेंगदाणे रात्रभर भिजत ठेवून दुसऱ्या दिवशी खाल्ले तर शरीराला जास्त फायदा होतो.

    भिजवलेल्या शेंगदाण्यांमध्ये असलेले पोषकतत्त्वं शरीर पूर्णतः शोषून घेते. हे घटक शरीरासाठी उपयुक्त असतात. डॉक्टरांच्या मते शेंगदाण्यांमध्ये भरपूर प्रमाणात लोहचे घटक आहेत. ज्यामुळे शरीराचे रक्ताभिसरण सुरळीत सुरू असते. सोबतच शरीरातील रक्ताची कमतरता देखील भरून निघते. जाणून घेऊया भिजवलेले शेंगदाणे खाल्ल्याने शरीराला होणारे फायदे.

    हृदयविकार- हृदयविकारांपासून आपले संरक्षण होईल, असे उपयुक्त गुणधर्म शेंगदाण्यांमध्ये आहेत. संशोधकांनी केलेल्या अभ्यासानुसार शेंगदाण्यांमध्ये कार्डिओप्रोटेक्टिव्ह गुणधर्म आहेत. जे लोक आपल्या आहारामध्ये नियमित स्वरुपात कार्डिओप्रोटेक्टिव्हयुक्त खाद्य पदार्थांचे सेवन करतात, त्यांनी आपल्या आहारात शेंगदाण्याचाही समावेश करावा. कार्डिओप्रोटेक्टिव्ह हा एक असा घटक आहे, ज्यामुळे हृदयविकाराशी संबंधित आजारांचा धोका कित्येक पटीनं कमी होण्यास मदत मिळते. आपल्या हृदयाचे आरोग्य निरोगी राहते आणि कार्यप्रणाली देखील सुरळीत सुरू राहते.

    मेंदूचे कार्य सक्रिय सुरू राहते- सुकामेव्यामुळे आपल्या मेंदूचे आरोग्य निरोगी राहण्यास मदत मिळते. यातील घटक आपल्या मेंदूसाठी उपयुक्त असतात. शेंगदाण्यामध्ये ओमेगा-3 फॅटी एसिड आहे. या गुणधर्मामुळे मेंदूची कार्यक्षमता वाढण्यास मदत होते. यामुळे डॉक्टारांचा सल्ला घेऊन मुलांच्या आहारामध्ये शेंगदाण्यांचा समावेश करावा. जेणेकरून त्यांच्या मेंदूची वाढ योग्य प्रकारे होईल. शेंगदाण्यांतील औषधी गुणांमुळे मुलांच्या स्मरणशक्तीवर सकारात्मक परिणाम होतो. पण अधिक प्रमाणात शेंगदाण्याचे सेवन करणं टाळलं पाहिजे. यामुळे शरीराला अपाय होण्याची भीती असते.

    त्वचेवर येतो तेज- प्रत्येक जण आपली त्वचा चमकदार आणि सुंदर दिसण्यासाठी कित्येक प्रकारच्या ब्युटी प्रोडक्ट्सचा वापर करत असतात. महागडे ब्युटी प्रोडक्ट वापरण्याऐवजी तुम्ही भिजवलेल्या शेंगदाण्यांचे सेवन केले तर तुमच्या त्वचेला कित्येक प्रकारे फायदा होऊ शकतो. शेंगदाण्यांमध्ये अँटी-ऑक्सिडेंटचे घटक आहेत. याच कारणामुळे जर तुम्ही सकाळी शेंगदाण्यांचे सेवन केलं तर त्वचेवर नैसर्गिक स्वरुपात तेज येण्यास मदत होईल. तसंच शेंगदाण्यांमध्ये सोरायसिस आणि एक्झिमा यांसारख्या त्वचाविकारांवर उपाय करणारे औषधी गुणधर्म आहेत.

    पचन प्रक्रिया होते मजबूत- फायबरमुळे शरीराची पचन प्रक्रिया सुरळीत सुरू राहते. पचनसंस्थेसाठी हा पोषक घटक अतिशय महत्त्वाचा आहे. यामुळे आपल्या आहारामध्ये नियमित स्वरुपात फायबरयुक्त पदार्थांचा समावेश करावा. शेंगदाण्यां मध्येही भरपूर प्रमाणात फायबरचे गुणधर्म आहेत. शेंगदाण्यांच्या सेवनामुळे बद्धकोष्ठता आणि पोटाचे दुखणे कमी होण्यास मदत मिळते. महत्त्वाचे म्हणजे शेंगदाण्यांमुळे वजन कमी होते. कारण यातील पोषक घटकांमुळे आपल्याला वारंवार भूक लागत नाही. परिणामी  शरीरामध्ये अतिरिक्त चरबी जमा होत नाही.