eye care tips

अखंड काळासाठी काम करणे, संगणक किंवा लॅपटॉपसमोर बसणे, टिव्ही आणि मोबाईलचा अमार्याद वापर करणे या कारणांमुळे देखील डोळ्यांना थकवा जाणवतो. थकलेला माणूस कसा ओळखावा माहित आहे का? तर त्याच्या डोळ्यांवरून! माणसाचे डोळे तो व्यक्ती किती उत्साही आणि किती निरुत्साही आहे ते सांगतात. डोळे हे इतके संवेदनशील असतात की मानसिक परिणाम असो वा शारीरिक परिणाम असो डोळ्यांवर तो लगेच दिसून येतो. म्हणूनच आपण जेव्हा खूप थकतो किंवा आपल्या शरीराला विश्रांतीची गरज असते तेव्हा आपले डोळे जड होतात.

हीच स्थिती अजून काही काळ राहिली तर त्याचा थेट डोळ्यावर परिणाम होऊन डोळ्याखाली काळे घेरे येऊ लागतात. डोळे हे आपल्या सौंदर्यात सुद्धा मोठी भर टाकतात. पण जेव्हा तुम्ही ताण तणावात असता वा थकलेल्या शरीराला वेळीच आराम देत नाही तेव्हा मात्र डोळ्यांचे सौंदर्य आपण हरवून बसतो. जर तुम्हाला तुमच्या डोळ्यांचे सौंदर्य टिकवायचे असले आणि तुमच्या डोळ्यांना निस्तेज होऊ द्यायचे नसले तर आज आपण काही खास टिप्स जाणून घेऊया.

हातांचा वापर

डोळ्यांवरील थकवा दूर करायचा असेल आणि पुन्हा एकदा फ्रेश व्हायचे असले तर सगळ्यात सोप्पा उपाय म्हणजे आपले हात होय. हो मंडळी तुम्ही कुठेही का असेना तुम्हाला केवळ तुमच्या हातांची गरज आहे आणि काही क्षणात तुमचे डोळे पुन्हा लखाखू लागतील. तुम्हाला इतकंच करायचं आहे की दोन्ही हातांचे पंजे एकमेकांवर जोरात चोळायचे आहेत.

सर्वात प्रथम हळूहळू चोळा आणि मग वेग वाढवा. जेव्हा हात अशा जोरात चोळल्याने गरम होतील तेव्हा थांबा आणि हे गरम हात 30 सेकंद आपल्या डोळ्यांवर ठेवा. तुम्ही जर दोन वेळा असे केले तर तुम्हाला अजून चांगला परिणाम दिसून येईल. हाताचे पंजे एकमेकांवर चोळल्याने एक्युप्रेशर पॉइंट्सवर दबाव निर्माण होतो आणि रक्ताभिसरण वाढते. हाताच्या उष्णतेमुळे डोळ्यांवरचा ताण कमी होतो आणि रक्ताभिसरण वाढल्याने शरीर पुन्हा उत्साही होते.

face wash

थंड पाण्याने डोळे धुवा

डोळ्यांवरचा थकवा दूर करण्याचा अजून एक सोप्पा उपाय म्हणजे थंड पाण्याने डोळे धुणे होय. पण एक गोष्ट लक्षात ठेवावी की अतिशय जास्त थंड पाण्याने डोळे धुवू नयेत. शक्य असल्यास फ्रीजचे अर्धे पाणी आणि साधे पाणी एकत्र घ्यावे आणि त्या पाण्याने डोळे धुवावेत. या

मुळे डोळ्यांवरचा ताण कमी होऊन पुन्हा एकदा तुम्हाला फ्रेश वाटेल. जगभरात हा पर्याय सर्वाधिक वापरला जातो. कारण यामुळे तुम्हाला कितीही थकवा असला तरी काही क्षणात तो दूर पळून जातो. तुम्हाला पुन्हा थकवा जाणवला तर एकदा नक्की हा उपाय ट्राय करून पहा.

थंड दूध

हा उपाय बऱ्याच जणांना माहित नाही पण डोळ्यांवरचा ताण दूर करण्याचा हा सुद्धा एक चांगला उपाय आहे. फ्रीजमध्ये थंड करायला ठेवलेले दुध एका चमच्यात घ्या. आता त्यात कापसाचा बोळा भिजवा. ३ ते ४ मिनिटे हा बोळा डोळ्यांवर ठेवा आणि नंतर बोळा बाजूला करून पाण्याने डोळे स्वच्छ धुवा. यामुळे डोळे आणि संपूर्ण शरीरात उत्साह संचारू लागेल.

अनेक मोठ्या व्यक्ती थकवा जाणवल्यावर हाच उपाय करतात आणि जाणकारांनी सुद्धा दुध हे डोळ्यांसाठी अपायकारक नसल्याचे म्हटले आहे. त्यामुळे तुम्ही सुद्धा नक्कीच हा उपाय कधीतरी वापरून पहायला हवा.

बर्फाचा शेक

जर थंड पाण्याने डोळे धुवून सुद्धा तुमचा थकवा दूर होत नसले तर तुम्ही हा उपाय वापरून पाहायला हवा. फ्रीज मधून आईसक्यूब बाहेर काढा. हलकेसे धुवून घ्या. आता त्यावर एक कपडा गुंडाळा आणि डोळ्यांना शेक द्या. केवळ २ ते ३ मिनिटेच शेक द्यावा कारण एवढा वेळ डोळ्यांना ताजेतवाने करण्यास पुरेसा आहे. डोळ्यांची सूज कमी करण्यासाठी, डार्क सर्कल्स घालवण्यासाठी हा उपाय मोठ्या प्रमाणावर केला जातो आणि त्याचे चांगले परिणाम सुद्धा दिसून येतात.

डॉक्टरकडे कधी जावे?

जर या सर्व उपायांनी तुम्हाला फरक पडत नसेल तर तुम्ही नक्कीच वैद्यकीय सल्ला घ्यायला हवा. डोळे अतिसंवेदनशील असतात. त्यांच्याबद्दल कोणताही निष्काळजीपणा घातक ठरू शकतो. काही होत नाही असा विचार करून तुम्ही डोळ्यांच्या समस्येकडे दुर्लक्ष केले तर त्याचे गंभीर परिणाम भोगावे लागू शकतात. म्हणून आवर्जून डोळ्यांची काळजी घ्या. शक्य तितके आनंदी राहण्याचा आणि तणावमुक्त व थकवा रहित जीवन जगण्याचा प्रयत्न करा.