राष्ट्रपती पदासाठी इच्छुकांचे उमेदवारी अर्ज

    राष्ट्रपती पदाच्या निवडणुकीची (Presidential Election) घोषणा झाल्यानंतर सत्ताधारी आणि विरोधकांमध्ये उमेदवार निवडीवरून बैठकांना सुरुवात झाली आहे. विरोधकांच्या बैठकीत राष्ट्रवादी काँग्रेसचे (NCP) अध्यक्ष शरद पवार (Sharad Pawar) यांना उमेदवारीसाठी आग्रह धरण्यात आला होता. मात्र, त्यांनी उमेदवारीला नकार दिला आहे. सत्ताधारी गोटातही उमेदवाराच्या निवडीबाबत चर्चा सुरू असून दुसरीकडे काही राष्ट्रपतीपदाच्या निवडणुकीसाठी ११ जणांनी अर्ज दाखल केले आहेत. त्यापैकी एका उमेदवाराचा अर्ज फेटाळण्यात आला आहेत.

    राष्ट्रपतीपदाच्या निवडणुकीसाठी आतापर्यंत ११ उमेदवारांनी अर्ज दाखल केले आहेत. हे सगळे हौशी उमेदवार आहेत. यातील लालू प्रसाद यादव (Lalu Prasad Yadav) हे बिहारचे असले तरी राष्ट्रीय जनता दलाचे प्रमुख नाहीत. यादीतील काही उमेदवारांची विविध कारणांनी चर्चा होत असते. यातील तामिळनाडूमधील डॉ. के. पद्मराजन हे होमिओपॅथिक डॉक्टर असून व्यावसायिक आहेत. त्यांचे नाव लिम्का बुक ऑफ रेकॉर्डमध्ये नोंदवले गेले आहे. मात्र, हे नाव ‘सर्वाधिक अपयशी’ उमेदवार म्हणून नोंदवण्यात आले आहे.

    राष्ट्रपतीपदाच्या निवडणुकीसाठी एका दाम्पत्याने अर्ज दाखल केला आहे. मोहम्मद ए हामिद पटेल आणि सायरा बानो मोहम्मद पटेल असे या दाम्पत्याचे नाव असून ते मुंबईतील आहेत. या दाम्पत्याने याआधीदेखील २०१७ मध्ये निवडणूक अर्ज दाखल केला होता.

    दिल्लीतून तीन उमेदवारांनी अर्ज दाखल केले असून, त्यात उद्योगपती जीवन कुमार मित्तल यांच्या नावाचा समावेश आहे. त्यांनी आतापर्यंत राष्ट्रपतींना पाच हजारहून अधिक पत्रे लिहिली आहेत. २०१२ आणि २०१७च्या राष्ट्रपतीपदाच्या निवडणुकीतही त्यांनी उमेदवारी दाखल केली होती. आता तिसऱ्यांदा ते निवडणूक रिंगणात उतरले आहेत.

    दाखल झालेले उमेदवारी अर्ज
    १. डॉ. के. पद्मराजन, सीलम, तामिळनाडू
    २. जीवन कुमार मित्तल, दिल्ली
    ३. मोहम्मद ए हामिद पटेल, मुंबई
    ४. सायरा बानो मोहम्मद पटेल, मुंबई
    ५. टी. रमेश, नमक्कल, तामिळनाडू
    ६. श्याम नंदन प्रसाद, मोकामा, बिहार
    ७. प्रा. दयाशंकर अग्रवाल, दिल्ली
    ८. ओम प्रकाश खरबंदा, दिल्ली
    ९. लालू प्रसाद यादव, बिहार
    १०. ए. मणिथन, तामिळनाडू
    ११. डॉ. मंदती तिरुपती रेड्डी, आंध्र प्रदेश