मध्य प्रदेशातही हिजाबवर येणार बंदी? एमपीचे शालेय शिक्षणमंत्री म्हणतात हिजाबवरील बंदी योग्यच, प्रथा घरासाठी आहेत, शाळेसाठी नाहीत

शिस्त आणि एकसमान ड्रेस कोड पाळणे आवश्यक आहे. पुद्दुचेरीमध्येही अरियनकुप्पम येथील एका शाळेतील शिक्षकाने हिजाबवर बंदी घातल्याच्या आरोपांच्या चौकशीचे आदेश प्रशासनाने दिले आहेत.

    कर्नाटकात (Karnataka) हिजाब (Hijab) घातलेल्या शाळकरी मुलींवरून (School Girls) सुरू झालेला वाद मध्य प्रदेश (Madhya Pradesh) आणि पुद्दुचेरीपर्यंत (Puducherry) पसरला आहे. कर्नाटक उच्च (Karnataka High Court)न्यायालयात या प्रकरणाची सुनावणी सुरू आहे. कर्नाटक उच्च न्यायालयात या प्रकरणाची सुनावणी सुरू असताना भाजपशासित मध्य प्रदेशच्या शालेय शिक्षणमंत्र्यांनी (Education Minister) आपले आदेश दिले.

    मध्यप्रदेशचे शालेय शिक्षण मंत्री इंदरसिंग परमार म्हणाले की, शिस्त आणि एकसमान ड्रेस कोड पाळणे आवश्यक आहे. पुद्दुचेरीमध्येही अरियनकुप्पम येथील एका शाळेतील शिक्षकाने हिजाबवर बंदी घातल्याच्या आरोपांच्या चौकशीचे आदेश प्रशासनाने दिले आहेत.

    मध्य प्रदेशातही हिजाबवर येऊ शकते बंदी

    मध्य प्रदेशचे शालेय शिक्षण मंत्री इंदर सिंग परमार म्हणाले की, हिजाबवर बंदी घालणे अगदी योग्य आहे. आमचे सरकार शिस्तीवर भर देणार असल्याचे ते म्हणाले. हिजाब हा शालेय गणवेशाचा भाग नाही, त्यामुळे तो शाळेत घालण्यावर बंदी घालण्यात यावी. रीतिरिवाज शाळेत नव्हे तर घरीच साजरे केले पाहिजेत. शाळांमध्ये ड्रेस कोडचे काटेकोरपणे पालन केले जाईल याची आम्ही खात्री करत आहोत.

    एमपीच्या शाळांमध्ये हिजाबवर बंदी घालण्यात येणार का, यावर उत्तर देताना ते म्हणाले की, गरज पडल्यास तसे केले जाईल, मात्र या प्रकरणाची सखोल चौकशी करूनच त्यानंतर योग्य तो निर्णय घेतला जाईल. मध्य प्रदेशात सुमारे १.२५ लाख सरकारी शाळा आहेत, जिथे शालेय गणवेश आहेत. पहिली ते आठवीपर्यंतच्या मुलांच्या गणवेशासाठी सरकार निधी देते.

    पुद्दुचेरीत एका शिक्षकाविरोधात तक्रार दाखल

    पुद्दुचेरीतील शिक्षण विभागाच्या प्रवक्त्याने सांगितले की, त्यांना विद्यार्थी संघटनांकडून तक्रारी आल्या होत्या की एका शिक्षकाने एका विद्यार्थिनीला हिजाब घालण्यापासून रोखले होते. नेमकं काय घडलं ते आम्हाला शोधायचं आहे. शाळेकडून कारवाईचा अहवाल आल्यानंतर पुढील कारवाईचा निर्णय घेतला जाईल.

    स्टुडंट्स फेडरेशन ऑफ इंडियाच्या स्थानिक प्रमुखाने सांगितले की, मुलगी तीन वर्षांपासून हिजाब घालून शाळेत येत होती, परंतु त्यापूर्वी कोणीही आक्षेप घेतला नाही, मग आता असे का होत आहे. ते म्हणाले की, वीरमपट्टिनम, एम्बलम आणि तिरुकानूर येथील अनेक शाळांमधून आरएसएसच्या शाखांसारख्या कवायती केल्या जात असल्याच्या तक्रारी आहेत.

    कर्नाटकात तीन दिवस शाळा-कॉलेज बंद

    हिजाबच्या वादावरून कर्नाटकात प्रचंड गदारोळ सुरू आहे. दिवसभर दोन्ही बाजूच्या विद्यार्थ्यांनी महाविद्यालयांमध्ये आंदोलने केली. यानंतर राज्य सरकारने पुढील तीन दिवस शाळा आणि महाविद्यालये बंद ठेवण्याचे निर्देश दिले आहेत. मुख्यमंत्री बसवराज बोम्मई यांनी सोशल मीडियावर ही माहिती दिली. इकडे केंद्रीय मंत्री गिरिराज सिंह यांनी हिजाबच्या वादामागे गझवा-ए-हिंदचा हात असल्याचे सांगितले. हा जातीय सलोखा बिघडवण्याचा कट असल्याचे त्यांनी म्हटले आहे.