हिंदूंनी घरात शस्त्र ठेवावीत; लव्ह जिहाद करणाऱ्यांना लव्ह जिहादसारखे उत्तर द्या, साध्वी प्रज्ञा सिंह ठाकूर यांचे वक्तव्य

हिंदूंना त्यांच्यावर आणि त्यांच्या प्रतिष्ठेवर हल्ला करणाऱ्यांना प्रत्युत्तर देण्याचा अधिकार आहे. हिंदू समाजाला किमान त्यांच्या घरात चाकू ठेवण्याचा सल्ला दिला आणि प्रत्येकाला स्वतःचे संरक्षण करण्याचा अधिकार असल्याचे प्रज्ञा सिंह ठाकूर यांनी सांगितले.

    नवी दिल्ली : भाजपच्या (BJP) खासदार साध्वी प्रज्ञा सिंह ठाकूर (Pragyasingh Thakur) यांनी पुन्हा एकदा वादग्रस्त वक्तव्य केले. कर्नाटकातील हिंदू (Hindu) कार्यकर्त्यांच्या हत्येबाबत बोलताना त्या म्हणाल्या की, हिंदूंना त्यांच्यावर आणि त्यांच्या प्रतिष्ठेवर हल्ला करणाऱ्यांना प्रत्युत्तर देण्याचा अधिकार आहे. हिंदू समाजाला किमान त्यांच्या घरात चाकू (Knife) ठेवण्याचा सल्ला दिला आणि प्रत्येकाला स्वतःचे संरक्षण करण्याचा अधिकार असल्याचे प्रज्ञा सिंह ठाकूर यांनी सांगितले. तसेच, त्यांना जिहादची परंपरा आहे. बाकी काही नाही तर ते लव्ह जिहाद (Love Jihad) करतात. प्रेम असले तरी त्यातही ते जिहाद करतात. आपणसुद्धा प्रेम करतो, आपण देवावर प्रेम करतो, संन्यासी आपल्या परमेश्वरावर प्रेम करतो, असे त्या म्हणाल्या.

    प्रज्ञा ठाकूर या ‘हिंदू जागरण वेदिके’च्या वार्षिक कार्यक्रमात त्या बोलत होत्या. त्या म्हणाल्या की, संन्यासी म्हणतात की देवाने निर्माण केलेल्या या जगात सर्व अत्याचारी आणि पापींचा अंत करा, अन्यथा प्रेमाची खरी व्याख्या इथे टिकणार नाही. त्यामुळे लव्ह जिहादमध्ये गुंतलेल्यांना त्याच पद्धतीने उत्तर द्या. तुमच्या मुलींचे रक्षण करा, त्यांना योग्य संस्कार द्या. याशिवाय हिंदू कार्यकर्त्याच्या हत्येकडे लक्ष वेधून त्यांनी लोकांना स्वसंरक्षणासाठी धारदार चाकू घरी ठेवण्यास सांगितले.

    प्रज्ञा ठाकूर म्हणाल्या की, लव्ह जिहाद करणाऱ्यांना लव्ह जिहादसारखे उत्तर द्या. तुमच्या मुलींना सुरक्षित ठेवा. मुलींना सुसंस्कृत ठेवा. घरी शस्त्र नसेल तर भाजी कापण्यासाठीचा चाकू धारदार ठेवा. त्यामुळे आपणही भाजी कापण्यासाठीच्या सुऱ्या धारदार ठेवल्या पाहिजेत. कधी संधी येईल माहित नाही. आपली भाजी चांगली कापली की शत्रूंचे तोंड आणि शीरही चांगले कापले जातील.