नाणार जमीन व्यवहाराप्रकरणी विधानसभाध्यक्ष नाना पटोले यांचे चौकशीचे निर्देश, समितीच्या पदाधिकाऱ्यांनी मांडले मुद्दे

रत्नागिरीतील (RATNAGIRI) बहुचर्चित नाणार रिफायनरी प्रकल्प (NANAR PROJECT) परिसरात खरेदी करण्यात आलेल्या जमीन विक्रीची रत्नागिरी अतिरिक्त जिल्हाधिकाऱ्यांच्या नियंत्रणात एक चौकशी समिती नेमण्यात आली आहे. या समितीला विधानसभाध्यक्ष नाना पटोले (NANA PATOLE) यांनी या खरेदी-विक्री व्यवहाराच्या चौकशी करण्याचे निर्देश दिले आहेत.

मुंबई : रत्नागिरीतील (RATNAGIRI) बहुचर्चित नाणार रिफायनरी प्रकल्प (NANAR PROJECT) परिसरात खरेदी करण्यात आलेल्या जमीन विक्रीची रत्नागिरी अतिरिक्त जिल्हाधिकाऱ्यांच्या नियंत्रणात एक चौकशी समिती नेमण्यात आली आहे. या समितीला विधानसभाध्यक्ष नाना पटोले (NANA PATOLE) यांनी या खरेदी-विक्री व्यवहाराच्या चौकशी करण्याचे निर्देश दिले आहेत.

रद्द झालेल्या नाणार प्रकल्पाच्या परिसरातील जमीनखरेदी-विक्रींच्या व्यवहारांची अतिरिक्त जिल्हाधिकारी यांच्यामार्फत चौकशी करण्यात यावी. भूमिपुत्रांना त्यांच्या जमिनी परत करण्यासंदर्भात प्राधान्याने विचार व्हावा. घाऊक पद्धतीने जमिनी विकत घेणारे परप्रांतीय व्यापाऱ्यांचे रॅकेट त्यावेळी कार्यरत होते किंवा कसे, याचाही तपास करण्यात यावा. याबाबत तातडीने कार्यवाही करुन एक महिन्याच्या आत कृती अहवाल सादर करावा, असे निर्देश विधानसभा अध्यक्ष नाना पटोले यांनी दिले.

कोकण रिफायनरी प्रकल्प विरोधी संघर्ष समितीतर्फे प्राप्त निवेदनासंदर्भात विधानसभा अध्यक्ष नाना पटोले यांच्या अध्यक्षतेखाली बैठक आयोजित करण्यात आली. या बैठकीत समितीतर्फे भावकीच्या सामूहिक मालकीच्या जमिनीची परस्पर विक्री होणे, बेपत्ता व मृत व्यक्तींच्या नावे बनावट आधार कार्ड काढून जमिनी विक्रीचे व्यवहार करणे, किंवा ठराविक कालावधीत अचानक खरेदी विक्रीचे मोठे व्यवहार होणे, असे मुद्दे समितीच्या पदाधिकाऱ्यांनी मांडले.

प्रकल्पाची अधिसूचना निघण्याआधी कवडीमोल भावाने शेतकऱ्यांच्या जमिनी खरेदी करुन त्यांना उचित मोबदल्यापासून वंचित ठेवले गेले असल्यास ही भूमिपुत्रांची फसवणूक ठरेल. भविष्यात असे प्रकारे घडू नये यासाठी उपाययोजना केली जावी, असे नाना पटोले यांनी स्पष्ट केले.