लोणावळा व मावळमधील पर्यटनस्थळी जमावबंदी ; एक किलोमीटरच्या परिसरात वाहने नेण्यासही मनाई

कोरोनाच्या संभाव्य तिसऱ्या लाटेच्या पार्श्वभूमीवर प्रशासन सतर्क

    पुणे : कोरोनाच्या वाढत्या संसर्गाच्या पार्श्वभूमीवर लोणावळा आणि मावळातील सर्वच पर्यटनस्थळी १४४ कलम लागू करत जमावबंदीचे आदेश देण्यात आले आहेत. पाच किंवा त्यापेक्षा अधिक व्यक्तींना एकत्र येण्यास मज्जाव करण्यात आला आहे. तसेच पर्यटनस्थळ व धबधब्यापासून एक किलोमीटर परिसरात वाहनांना बंदी घालण्यात आली आहे.

    गेल्या काही दिवसांपासून लोणावळा आणि मावळातील पर्यटनस्थळी वर्षाविहारासाठी पर्यटकांची मोठ्या प्रमाणात गर्दी होत आहे. करोनाचे नियम पायदळी तुडवत नागरिक व पर्यटक लोणावळा व मावळातील पर्यटनस्थळी गर्दी करत आहे. करोनाची दुसरी लाट ओसरली, परंतु तिसऱ्या लाटेची शक्यता वर्तवली जात आहे. त्यामुळे नागरिकांनी पर्यटनस्थळी गर्दी करून नये, नियमांचे पालन करावे असे आवाहन उपमुख्यमंत्री अजित पवार यांनी नुकतेच केले होते. तरी देखील नागरिक व पर्यटक नाहक गर्दी करत असल्याने आजपासून नवीन नियम लागू करण्यात आले आहेत. नागरिकांनी पर्यटनस्थळी गर्दी करू नये, जमावबंदीच्या आदेशाचे उल्लंघन करणाऱ्यांच्या विरोधात कारवाई करण्यात येईल, असा इशारा लोणावळा शहर पोलीस निरीक्षक दिलीप पवार यांनी दिला आहे.

    कुठे लागू आहेत नियम व प्रतिबंध !
    भुशीडॅम, घुबड तलाव, पवना, लोणावळा, तुंगाली, वलवण , उकसान, शिरोता धरण परिसर, टायगर, लायन्स, शिवलिंग, मंकी व राजमाची पॉइंट, अमृतांजन ब्रिज, कार्ला, भाजे, बेडसे लेणी, लोहगड, विसापूर, तिकोणा गड व किल्ला परिसर या ठिकाणी एक किलोमीटर परिसरात हे नियम लागू राहतील व खालील बाबींना प्रतिबंध असेल.
    पाच किंवा पाचपेक्षा जास्त व्यक्तींना वरील नमूद ठिकाणी एकत्र येण्यावर प्रतिबंध
    पावसामुळे वेगाने वाहणाऱ्या व खोल पाण्यात उतरणे व पोहण्यास प्रतिबंध
    धबधब्यावर जाणे अथवा पाण्याच्या प्रवाहाखाली बसणे.
    पावसामुळे धोकादायक झालेली ठिकाणे, धबधबे, डोंगर-दऱ्यांचे कठडे, धोकादायक वळणे याठिकाणी सेल्फी काढण्यास व चित्रीकणास प्रतिबंध
    पर्यटनस्थळे व नैसर्गिक धबधब्याच्या परिसरामध्ये मद्यपान करणे, मद्य बाळगणे, मद्य पिऊन वाहतूक करणे, अनाधिकृत मद्य विक्री करणे व सार्जनिक ठिकाणी उघड्यावर मद्य सेवन करण्यास प्रतिबंध .

    वाहतुकीचे रस्ते तसेच धोकादायक ठिकाणी वाहने थांबविण्यास प्रतिबंध.
    बेदरकारपणे वाहन चालवणे, धोकादायक स्थितीत वाहन ओव्हरटेक करणे.
    सार्वजनिक ठिकाणी खादयपदार्थ, कचरा, काचेच्या व प्लास्टिकच्या बाटल्या व थरमाकॉलचे व प्लास्टिकचे साहित्य उघडयावर व इतरत्र फेकणे.
    सार्वजनिक ठिकाणी येणाऱ्या महिलांची छेडछाड, टिंगल, टवाळी करणे, महिलांशी असभ्य वर्तन करणे, असभ्य हावभाव करणे, शेरेबाजी करणे .