bharadidevi temple

आंगणेवाडी (Aanganewadi) हे मालवण (Malvan) तालुक्यातील सर्वात मोठे तीर्थक्षेत्र असून तेथील भराडीदेवी हे सुप्रसिद्ध आहे. दरवर्षी भराडीदेवीच्या यात्रेकरिता मुंबईसह महाराष्ट्रातून दरवर्षी सुमारे ५ लाख भाविक दर्शनासाठी येतात.

    मुंबई: नवसाला पावणाऱ्या तसेच कोकणातील लाखो भाविकांचे श्रध्दास्थान असलेल्या आंगणेवाडीतील (Aanganewadi) भराडीदेवी मंदिर (Bharadidevi Temple) परिसरातील संपूर्ण रस्त्यांचा तातडीने विकास करण्यात येणार असून सार्वजनिक बांधकाम मंत्री तथा सिंधूदूर्ग (Sindhudurg) जिल्हयाचे पालकमंत्री रविंद्र चव्हाण (Ravindra Chavan)यांनी येथील रस्त्यांना प्रमुख जिल्हा मार्ग म्हणून दर्जोन्नती देण्याचा निर्णय घेतला आहे. तसेच, या सर्व रस्त्यांचे डांबरीकरण करुन सुस्थितीत करण्याच्या कामासाठी रुपये १०.६० कोटींचा निधी मंजूर करण्यात आला आहे. यामुळे आंगणेवाडी परिसरातील नागरी सुविधा व विकास कामांच्या माध्यमातून मोठया प्रमाणात या परिसराचा कायापालट होणार आहे.

    सिंधुदूर्ग जिल्हयाच्या पालकमंत्री पदाचा पदभार स्वीकारल्यानंतर सार्वजनिक बांधकाम मंत्री रविंद्र चव्हाण यांनी आंगणेवाडीवासियांना विकासकामांची भेट दिली आहे. आंगणेवाडी मधील सोयी सुविधांसाठी पालकमंत्री रविंद्र चव्हाण यांनी पुढाकार घेतला आहे. सिंधुदूर्ग जिल्हा परिषदेच्या ताब्यातील दोन इतर जिल्हा मार्ग व एक ग्रामीण मार्ग दर्जोन्नती करण्याचा निर्णय घेतला आहे. सिंधुदूर्ग जिल्हयातील आंगणेवाडीला जोडणाऱ्या सर्व रस्त्यांचे आता डांबरीकरण करण्यात येणार आहे. यामध्ये काळसे कट्टा रस्ता, मालवण बेळणा रस्ता, गोळवण पोईब रस्ता, ओझर कांदळगाव मागवणे मसुरे बांदिवडे आडवली भटवाडी रस्ता, राठीवडे हिवाळे ओवळीये कसाल ओसरगाव रस्ता, चौके धामापूर रस्ता व कुमामे नांदोस तिरवडे सावरवाड रस्ता या सर्व रस्त्यांचा यामध्ये समावेश असून या रस्त्यांच्या सुसज्जीकरणासाठी १० कोटी ६० लाखांचा निधी पालकमंत्री रविंद्र चव्हाण यांनी मंजूर केला आहे.

    आंगणेवाडी हे मालवण तालुक्यातील सर्वात मोठे तीर्थक्षेत्र असून तेथील भराडीदेवी हे सुप्रसिद्ध आहे. दरवर्षी भराडीदेवीच्या यात्रेकरिता मुंबईसह महाराष्ट्रातून दरवर्षी सुमारे ५ लाख भाविक दर्शनासाठी येतात. त्याचप्रमाणे मालवण तालुक्यातील तारकर्ली व देवबाग येथील समुद्र किनारे व प्रसिध्द सिंधुदूर्ग किल्ला येथे भेट देण्याकरिता ऑक्टोंबर व मे महिन्यांच्या दरम्यान पर्यटकांची मोठया प्रमाणात गर्दी असते.

    पालकमंत्री रविंद्र चव्हाण यांनी मंजूर केलेले हे रस्ते आंगणेवाडीला जाणारे प्रमुख रस्ते असल्याने या रस्त्यांवरुन वाहतूकीची वर्दळ मोठया प्रमाणात असते. म्हणूनच सदर रस्ते प्रमुख जिल्हा मार्ग म्हणून दर्जोन्नती करण्याचा निर्णय पालकमंत्री रविंद्र चव्हाण यांनी घेतला आहे. तसेच, बिळवस आंगणेवाडी रस्ता हा ४.३०० कि.मी. लांबीच्या रस्त्याचे काम सुध्दा आता लवकरच सुरु होणार आहे. तसेच, चौके आमडोस माळगांव मांगवणे आंगणेवाडी रस्ता हा एकूण २२.२०० कि.मी. लांबीच्या रस्त्याचा सिंधुदूर्ग जिल्हयातील प्रमुख जिल्हा मार्ग रस्त्यामध्ये दर्जोन्नती करण्याचा निर्णय घेण्यात आल्यामुळे लवकरच येथील सर्व रस्ते सुसज्ज व दर्जेदार होणार आहेत.

    तसेच सिंधुदूर्ग जिल्हयातील दोडामार्ग तालुक्यातील कोल्हापूर चंदगड तिल्लारी दोडामार्ग रस्त्यावरील मोठया धोकादायक पुलाची पुनर्बांधणी करण्याचा निर्णय पालकमंत्री रविंद्र चव्हाण यांनी घेतला असून या कामासठी सुमारे २ कोटीच्या निधीला मंजूरी देण्यात आली आहे.

    आंगणेवाडीतील भराडीदेवीची यात्रा दरवर्षी साधारणत: फेब्रुवारी मार्चमध्ये होत असते. त्यामुळे, या यात्रेच्या पूर्वी या प्रमुख रस्त्यांची कामे व येथील मंदिर परिसर सुसज्ज करण्याच्या दृष्टीने विभागाला आदेश देण्यात आले आहेत. आंगणेवाडीच्या विकास कामांच्या महत्वपूर्ण सोयीसुविधांसाठी निधी कमी पडू देणार नाही. पुढील वर्षी येणाऱ्या आंगणेवाडी यात्रेच्या पूर्वीच सर्व कामे युद्ध पातळीवर पूर्ण करणार असल्याची माहिती पालकमंत्री रविंद्र चव्हाण यांनी दिली.