येरवडा मध्यवर्ती कारागृहात जन्मठेपेची शिक्षा भोगत असलेल्या कैद्यानेच मनीऑर्डर रजिस्टारमध्ये खोट्या नोंदी करुन तब्बल २६ लाख ६९ हजार ९९१ रुपयांची फसवणूक केल्याचा प्रकार समोर आला आहे.
पुणे : येरवडा मध्यवर्ती कारागृहात जन्मठेपेची शिक्षा भोगत असलेल्या कैद्यानेच मनीऑर्डर रजिस्टारमध्ये खोट्या नोंदी करुन तब्बल २६ लाख ६९ हजार ९९१ रुपयांची फसवणूक केल्याचा प्रकार समोर आला आहे. त्याने स्वत:च्या व इतर कैद्यांच्या नावे या नोंदी करून फसवणूक केली आहे. हा प्रकार तब्बल दोन वर्षांनी उघडकीस आला आहे.
सचिन रघुनाथ फुलसुंदर (रा. येरवडा कारागृह, मुळ रा. मोकास बाग, जुन्नर) याच्यावर येरवडा पोलिसांनी गुन्हा दाखल केला आहे. याप्रकरणी तुरुंगाधिकारी बापुराव भीमराव मोटे यांनी येरवडा पोलीस ठाण्यात तक्रार दिली आहे़. हा प्रकार २०२१ ते ऑगस्ट २०२३ दरम्यान घडला.
पोलिसांनी दिलेल्या माहितीनुसार, नारायणगाव येथील खुनाचा प्रयत्न करणे व बलात्कार या गुन्ह्यात सत्र न्यायालयाने सचिन फुलसुंदर याला २१ मे २००९ रोजी जन्मठेपेची शिक्षा सुनावली आहे. तो मे २००५ पासून येरवडा कारागृहात आहे़. कारागृह प्रशासनाने त्याला साफसफाईचे काम दिले होते. कारखाना विभागात तयार होणार्‍या वस्तू बाहेर पाठविण्यास मदतीचे बहाण्याने तो न्याय विभागात जात असे. तेथे कैद्यांना त्यांचे नातेवाईकांनी केलेल्या मनीऑर्डरचे रजिस्टर असते. कैद्यांना त्यांचे नातेवाईक कारागृहात दैंनदिन गरजा भागविण्यासाठी पैसे पाठवत असतात. त्याची नोंद या रजिस्टरमध्ये केलेली असते. त्यातील नोंदीनुसार कैंद्यांना कॅन्टीनमधून आवश्यक त्या वस्तू घेता येतात.
सचिन फुलसुंदर याने तेथील रजिस्टरमध्ये फेरफार करुन हुबेहुब खोटी दिनांक, खोटी स्वाक्षरी व खोटे हिशोब तयार केले. त्यात कारागृहातील कैद्यांच्या नावावर मोघम रक्कमा टाकून मनीऑर्डर आल्याची नोंद केली. स्वत:च्या नावावरही रक्कमा टाकल्या. ही रक्कम त्याने कॅन्टीनमध्ये वापरुन शासनाची २६ लाख ६९ हजार ९११ रुपयांची फसवणूक केली. हा प्रकार उघडकीस आल्यानंतर तक्रार देण्यात आली आहे. पोलीस उपनिरीक्षक काटे तपास करीत आहेत.
Loading ...