Pimpari मराठवाडा, कर्नाटक, सोलापूर मार्गावरील २८ फेऱ्या रद्द

पिंपरी :  मराठा आरक्षण आंदोलनाच्या पार्श्वभूमीवर गेल्या काही दिवसांपासून एसटी बसला टार्गेट केले जात आहे. दोन दिवसांपूर्वी वल्लभनगर आगारातून पंढरपूरला जात असलेल्या बसला जाळण्यात आले. त्यामुळे आगारातून मराठवाडा, कर्नाटक, सोलापूर मार्गावरील सुमारे ७ बसच्या २८ फेऱ्या रद्द करण्यात आल्या आहेत. ऐन दिवाळीच्या पार्श्वभूमीवर बस फेऱ्या बंद करण्यात आल्याने आगाराचे आर्थिक नुकसान तर, अनेक प्रवाशांना आपल्या गावी जात येत नसल्याने त्यानाही त्रास होत आहे.

वल्लभनगर आगारातून देऊळगाव राजा कोळ ही एसटी बस सोमवारपासून (दि.३०) बंद ठेवण्यात आली आहे. दोन दिवसांपूर्वी याच आगारातून पंढरपूरला जात असललेली एसटी बस पंढरपूर केवळ ३० किलोमीटर अंतरावर असताना पेटवून देण्यात आली. त्यामुळे बुधवारी (दि.१) आगारात पोलिसांचा मोठा बंदोबस्त होता. तसेच आगारातून सोलापूर, बेळंब, उमरगा, तुळजापूर, मुरुम, देऊळगाव राजा या व कर्नाटक मार्गावर धावणाऱ्या विजापूर, गाणगापूर, हैद्राबाद या एसटी बसच्या फेऱ्या रद्द करण्यात आल्या आहेत. तसेच एसटी बस बंद असल्याने व आगारात पोलीस बंदोबस्त असल्याने आगाराला छावणीचे स्वरूप आले होते.
आगारात प्रवासी कमी आणि बंदोबस्तासाठी असलेल्या पोलिसांची संख्या जास्त होती.

जालना, बीड या परिसरात मनोज जरांगे पाटील यांना पाठिंबा देण्यासाठी बंद पाळला जात आहेत. त्यामुळे कोणताही अनुचित प्रकार घडू नये म्हणून खबरदारीसाठी आगारातून जालना मार्गे सुटणारी ही बस बंद ठेवण्यात आली. नागरिक पर्यायी मार्गांचा निवड करत, बस बदलत गाव गाठत आहेत. तर, पंढरपूरला बस जाळण्यात आल्याने त्या मार्गावरील बसही बंद ठेवल्याचे आगारप्रमुख संजय वाळवे यांनी सांगितले.

-पुण्यातून जाणाऱ्या एसटी बसेसच्या पावणेआठशे फेऱ्या रद्द, मराठवाडा, विदर्भाकडे जाणाऱ्या बस जागेवरच उभ्या
पुणे मराठा आरक्षणाबाबत राज्यात विविध ठिकाणी आंदोलन सुरू आहे. मराठवाडा आणि विदर्भातील काही भागांत या आंदोलनाला वेगळे वळण मिळाले. त्यामुळे सुरक्षिततेच्या कारणास्तव या भागांत पुण्यातून सोडण्यात येणाऱ्या एसटीच्या बसफेऱ्या रद्द करण्यात आल्या आहेत.  दरम्यान, पुण्यातून दररोज १ हजार ५५६ नियोजित बस फेऱ्या आहेत. त्यामध्ये बुधवारी (दि.१) आंदोलनामुळे ७७० फेऱ्या रद्द झाल्या. त्यामध्ये प्रामुख्याने बीडसह अमरावती, नागपूर, सोलापूर मार्गांवरील फेऱ्या रद्द करण्यात आल्याची माहिती पुणे एसटी महामंडळाने दिली.