पत्रकार प्रकाश तिराळे यांच्यावर हल्ला करणाऱ्यांवर कारवाई करावी; संघटनेचे पोलिस प्रमुखांना निवेदन

मुरगुड (ता. कागल) येथील पत्रकार प्रकाश तिराळे यांनी खरी, वस्तुनिष्ठ बातमी लावल्याच्या रागातून शिवसेना जिल्हाप्रमुख (एकनाथ शिंदे गट) व मुरगुडचे माजी नगराध्यक्ष राजेखान कादरखान जमादार यांच्यासह अन्य दोघांनी पत्रकार तिराळे यांना मारहाण केली.

    शिरोली / नवराष्ट्र न्यूज नेटवर्क : मुरगुड (ता. कागल) येथील पत्रकार प्रकाश तिराळे यांनी खरी, वस्तुनिष्ठ बातमी लावल्याच्या रागातून शिवसेना जिल्हाप्रमुख (एकनाथ शिंदे गट) व मुरगुडचे माजी नगराध्यक्ष राजेखान कादरखान जमादार यांच्यासह अन्य दोघांनी पत्रकार तिराळे यांना मारहाण केली. त्यांच्यावर कठोर कारवाई करण्याबाबतचे निवेदन कोल्हापूर डिस्ट्रिक्ट रिपोर्टर्स वेल्फेअर असोसिएशनच्या वतीने जिल्हा पोलीस प्रमुखांना देण्यात आले. पोलीस प्रमुखांच्या वतीने जिल्हा विशेष शाखेचे पोलीस निरीक्षक तानाजी सावंत यांनी स्विकारले.

    निवेदन देताना संघटनेचे अध्यक्ष सुधाकर निर्मळे, उपाध्यक्ष अभिजीत कुलकर्णी, सचिव सुरेश पाटील खजानीस, सदानंद उर्फ नंदू कुलकर्णी, सुरेश कांबरे, प्रा. रविंद्र पाटील यांच्यासह अन्य पत्रकार उपस्थित होते. संघटनेच्या निवेदनात म्हटले आहे की, मुरगुडचे पत्रकार प्रकाश तिराळे यांनी मुरगुड येथील खरी व वस्तुनिष्ठ बातमी लावली होती. त्या रागातून राजेखान जमादार, आसिफखान उर्फ मॉन्टी आसदखान जमादार व संदीप अशोक सणगर यांनी गुरूवारी (दि.९) सायंकाळी मारहाण केली. ही अरेरावी व मारहाणीची घटना पत्रकारिता आणि लोकशाहीला मारक असून, पत्रकारांवर दहशत निर्माण करणारी आहे. या घटनेचा कोल्हापूर डिस्ट्रिक्ट रिपोर्टर्स वेल्फेअर असोसिएशनच्या वतीने आम्ही जाहीर निषेध करत आहोत.

    प्रकाश तिराळे यांनी दिलेल्या बातमीत कोणाच्याही नावाचा उल्लेख करण्यात आलेला नाही. घडलेल्या घटनेचे वृत्तांकन करण्याचे काम पत्रकार प्रकाश तिराळे यांनी केले आहे. समाजात अनेक घटना घडत असतात. त्याची माहिती संकलित करून कार्यालयात पोहोचविण्याचे काम पत्रकार करत आहेत. त्यांना झालेली मारहाण म्हणजे पत्रकारिता आणि लोकशाहीवर केलेला भ्याड हल्ला आहे. त्यामुळे राजेखान कादरखान जमादार, आसिफखान उर्फ मॉन्टी आसदखान जमादार, संदीप अशोक सणगर यांच्यावर पत्रकार संरक्षण कायद्याअंतर्गत तातडीने कठोर कारवाई करण्याची मागणी केली आहे.