वारजेत ११ वर्षीय शाळकरी मुलीच्या अपहरणाचा प्रयत्न..!

शाळकरी मुलीला पळवून नेण्याचा प्रयत्न करण्यात आल्याची घटना वारजे भागात घडली. मुलीने प्रसंगावधान राखून पळवून नेण्याचा प्रयत्न करणाऱ्या आरोपीला धक्का देऊन पळ काढला. याप्रकरणी वारजे पोलिसांनी संजिप राय याच्या विरोधात गुन्हा दाखल करण्यात आला आहे.

    पुणे : शाळकरी मुलीला पळवून नेण्याचा प्रयत्न करण्यात आल्याची घटना वारजे भागात घडली. मुलीने प्रसंगावधान राखून पळवून नेण्याचा प्रयत्न करणाऱ्या आरोपीला धक्का देऊन पळ काढला. याप्रकरणी वारजे पोलिसांनी संजिप राय याच्या विरोधात गुन्हा दाखल करण्यात आला आहे.

    तक्रारदार अकरा वर्षीय मुलगी एका शाळेत आहे. आरोपी राय शाळेसमोर असलेल्या एका चहा विक्री दुकानात काम करतो. शाळा सकाळी साडे सातला भरते. मुलगी बसमधून शाळेत येते. शाळा सुरु होण्यापूर्वी मुलगी शाळेतील सुरक्षारक्षकाजवळ थांबते. सुरक्षारक्षक चहा पिण्यासाठी गेला. आरोपी राय मुलीजवळ आला. चहा प्यायला चल, असे सांगून त्याने मुलीला पळवून नेण्याचा प्रयत्न केला. मुलीने आरडाओरडा केला. मुलीने प्रसंगावधान राखून आरोपीचा हात झटकला. चहा पिऊन शाळेत निघालेल्या सुरक्षारक्षकाने आणि एका दुचाकीस्वाराने हा प्रकार पाहिला. दुचाकीस्वाराने रायला फटाकावले. आरोपी तेथून पसार झाला. मुलगी शाळेत परतली.

    तिने वर्गशिक्षकांना या घटनेची माहिती दिली. वर्गशिक्षिकेने मुलीच्या आईला माहिती दिली. मुलीच्या आईने वारजे पोलीस ठाण्यात तक्रार दिली. त्यानंतर बाल लैंगिक अत्याचार कायद्यान्वये गुन्हा दाखल करण्यात आला. पोलीस उपनिरीक्षक जाधव तपास करत आहेत.