मुख्यमंत्री उद्धव ठाकरे यांच्या ताफ्यात अनोळखी व्यक्तीने कार घुसवली, मोठा अनर्थ टळला

मुख्यमंत्री उद्धव ठाकरे आज राज्यपाल भगतसिंह कोश्यारी यांना वाढदिवसाच्या शुभेच्छा देण्यासाठी राजभवनावर गेले होते. तिथून परतत असताना धक्कादायक प्रकार घडला. एका व्यक्तीने मुख्यमंत्र्यांच्या कार समोरच त्याची कार घुसवली. या प्रकारामुळे मोठी दुर्घटना घडण्याची शक्यता होती.

    मुंबई : मुख्यमंत्री उद्धव ठाकरे आज राज्यपाल भगतसिंह कोश्यारी यांना वाढदिवसाच्या शुभेच्छा देण्यासाठी राजभवनावर गेले होते. तिथून परतत असताना धक्कादायक प्रकार घडला. एका व्यक्तीने मुख्यमंत्र्यांच्या कार समोरच त्याची कार घुसवली. या प्रकारामुळे मोठी दुर्घटना घडण्याची शक्यता होती. पण मुख्यमंत्र्यांच्या ताफ्यामधील गाड्यांचा वेग कमी असल्याने मोठा अपघात टळला.

    मुख्यमंत्री उद्धव ठाकरे यांचे सुरक्षा कवच भेदून एका व्यक्तीने त्याची कार थेट मुख्यमंत्र्यांच्या ताफ्यात घुसवली. या व्यक्तीने मुख्यमंत्र्यांच्या कार समोरच त्याची कार घुसवल्यामुळे मुख्यमंत्र्यांच्या सुरक्षा व्यवस्थेवर प्रश्नचिन्ह उपस्थित होत आहे. मुख्यमंत्री उद्धव ठाकरे यांच्या कारच्या सुरक्षा व्यवस्थेत अनोळखी कार घुसूनही कार मालकावर मुंबई पोलिसांची कोणतीही कारवाई का केली नाही? असा प्रश्न उपस्थित होतोय. मुंबई पोलिसांच्या निष्क्रियतेवर, आणि पोलिसांच्या दूहेरी भूमिकेवर प्रचंड संताप व्यक्त केला जातोय.

    दरम्यान मुख्यमंत्री उद्धव ठाकरे यांच्या कारचा ताफा राजभवन येथून ‘वर्षा’ निवास्थानी जात असताना एका व्यक्तीने त्याची कार मुख्यमंत्री उद्धव ठाकरे यांचा प्रोटोकॉल तोडून आतमध्ये घुसवली. त्यामुळे मुख्यमंत्री उद्धव ठाकरे यांच्या कारचा ताफा अचनाक तात्काळ थांबवावा लागला. पण मुख्यमंत्री उद्धव ठाकरे यांच्या सुरक्षेसाठी असणाऱ्या कोणत्याही पोलिसांनी या व्यक्तीची कार अडवली नाही. किंवा त्याला जाबही विचारला नाही. मुख्यमंत्री उद्धव ठाकरे यांची सुरक्षा तोडणाऱ्या व्यक्तीला ताब्यात न घेता त्याची कोणतीही चौकशी न करता पोलिसांनी कसे काय सोडले? असाही प्रश्न उपस्थित होतोय.