तासगाव प्रांत कार्यालयाची लवकरच घोषणा, मुख्यमंत्र्यांची रोहित पाटील यांना ग्वाही ; मुंबईत घेतली भेट

राज्य सरकारच्या (Maharashtra Government) दोन तालुक्यासाठी एक उपविभागीय कार्यालय धोरणानुसार तासगाव (Tasgaon) आणि कवठेमहांकाळ या तालुक्यांसाठी स्वतंत्र तासगाव उपविभाग निर्मीतीचा प्रस्ताव अंतिम टप्प्यात आहे. प्रस्तावास मंजूरी देऊन लवकरच निर्मीतीची घोषणा करणार असल्याची ग्वाही मुख्यमंत्री एकनाथराव शिंदे यांनी दिली, अशी माहिती राष्ट्रवादीचे युवा नेते रोहित आर. आर. पाटील यांनी दिली आहे.

    तासगाव : राज्य सरकारच्या (Maharashtra Government) दोन तालुक्यासाठी एक उपविभागीय कार्यालय धोरणानुसार तासगाव (Tasgaon) आणि कवठेमहांकाळ या तालुक्यांसाठी स्वतंत्र तासगाव उपविभाग निर्मीतीचा प्रस्ताव अंतिम टप्प्यात आहे. प्रस्तावास मंजूरी देऊन लवकरच निर्मीतीची घोषणा करणार असल्याची ग्वाही मुख्यमंत्री एकनाथराव शिंदे यांनी दिली, अशी माहिती राष्ट्रवादीचे युवा नेते रोहित आर. आर. पाटील यांनी दिली आहे. बुधवारी मुंबईत रोहित पाटील यांनी मुख्यमंत्र्यांची भेट घेऊन ही मागणी केली होती.

    रोहित पाटील म्हणाले, तत्कालीन गृहमंत्री आर आर पाटील यांनी तासगाव- कवठेमहांकाळ मतदारसंघातील दोन तालुक्यांचे प्रशासकीय एकत्रीकरण करण्याचा संकल्प केला. त्यानुसार दोन तालुक्यांसाठी स्वतंत्र उपविभाग करण्याचा प्रस्ताव विचाराधीन होता. २०१० साली महसूल व वन विभागाने तसा पत्रव्यवहार उपविभागीय कार्यालय, मिरज यांच्याशी केला.

    काही कारणास्तव तासगाव उपविभागाचा प्रस्ताव बारगळला. तासगाव व कवठेमहांकाळ या तालुक्यांचा कारभार हा मिरज उपविभागीय कार्यालयातून चालू आहे. दोन्हीही तालुक्यातील लोकांना शेतजमीनीचे खटले, विद्यार्थ्यांचे दाखले तसेच इतर कामासाठी मिरजला जावे लागते.

    दरम्यान दोन तालुक्यासांठी एक उपविभाग कार्यालय करण्याचा निर्णय सरकारने घेतला. यानुसार जिल्ह्यात कडेगाव आणि जत ही दोन उपविभागीय कार्यालये निर्माण करण्यात आली. स्वतंत्र सांगली तालुका मंजूर झाला. तासगाव व कवठेमहांकाळ दोन तालुक्यांसाठी तासगावला उपविभागीय कार्यालय करावे असा प्रस्ताव ३० जून २०१७ ला मिरज उपविभागीय अधिकारी यांनी जिल्हाधिकारी विजय काळम-पाटील यांचेकडे पाठविला.

    १ जुलै २०१७ ला तत्कालीन जिल्हाधिकारी विजय काळम-पाटील यांनी तासगाव उपविभाग निर्मिती बाबतचा प्रस्ताव पुणे विभागीय आयुक्त कार्यालयाकडे सादर केला. पुन्हा एकदा प्रस्ताव बारगळला होता. राज्यात महाविकास आघाडी सरकार सत्तेत येताच या उपविभागीय कार्यालय निर्मीतीला वेग आला. हा प्रस्ताव पुणे विभागीय आयुक्तांकडून मंत्रालयात सादर झाला.

    दोन तालुक्यातील १२९ गावांसाठी उपविभागीय कार्यालय

    या प्रस्तावास मंजूरी मिळून तासगाव उपविभाग निर्मितीची घोषणा लवकर करण्यात यावी या मागणीसाठी मुख्यमंत्र्यांची भेट घेतली, त्याला मुख्यमंत्र्यांनी सकारात्मक प्रतिसाद दिला आहे. महसूलच्या अधिकाऱ्यांकडून याबाबत माहिती घेऊन त्यास मंजूरी देणार असल्याची ग्वाही दिली. यानंतर या दोन तालुक्यातील १२९ गावासाठी तासगाव येथे उपविभागीय कार्यालय सुरु होणार आहे.