Bawankule's reply to Sanjay Raut's tweet
Bawankule's reply to Sanjay Raut's tweet

ठाकरे गटाचे फायर ब्रॅंड नेते असलेल्या संजय राऊत यांनी सकाळी भाजप प्रदेशाध्यक्ष बावनकुळे यांचा कॅसिनोमधील फोटो ट्विट करीत गंभीर दावे केल्याने राजकीय वर्तुळात खळबळ उडाल्याचे पाहायला मिळाले. त्यावर भाजपनेसुद्धा आदित्य ठाकरेंचा ग्लाससोबतचा फोटो पाठवत जोरदार पलटवार केला आहे. त्यानंतर आता चंद्रशेखर बावनकुळे यांनीसुद्धा यावर प्रत्त्युत्तर दिले आहे.

    शिवसेना (ठाकरे गट) खासदार संजय राऊत यांनी भाजपा प्रदेशाध्यक्ष चंद्रशेखर बावनकुळे यांच्यावर फोटो ट्वीट करत गंभीर आरोप केले होते. महाराष्ट्र पेटलेला आहे… आणि हे महाशय मकाऊ येथे कॅसिनोत जुगार खेळत आहेत,’ असं म्हणत संजय राऊतांनी बावनकुळेंना लक्ष्य केलं होतं. याला बावनकुळेंनी प्रत्युत्तर दिलं आहे.

    संजय राऊत काय म्हणाले?

    ‘एक्स’ अकाउंटवर संजय राऊतांनी म्हटले, महाराष्ट्र पेटलेला आहे आणि हे महाशय मकाऊ येथे कॅसिनोत जुगार खेळत आहेत. फोटो झूम करून पाहा, ते तेच आहेत ना? पिक्चर अभी बाकी है”

    “हिंदुत्ववादी असल्याने महाशय द्युत, खेळले तर…”
    “१९ नोव्हेंबर… मध्यरात्री… मुक्काम : मकाऊ, वेनेशाईन… साधारण ३.५० कोटी कॅसिनो जुगारात उडवले, असं प्रत्यक्षदर्शी सांगतात. हिंदुत्ववादी असल्याने महाशय द्युत… खेळले तर बिघडले कोठे? ते तेच आहेत ना?” असा खोचक प्रश्नही राऊतांनी उपस्थित केला होता.

    “जेवढे खुलासे कराल तेवढे फसाल”
    “ते म्हणे.. कुटुंबासह मकाऊला गेले आहेत, जाऊ द्या. त्यांच्याबरोबर बसलेली फॅमिली चिनी आहे का? ते म्हणे कधीच जुगार खेळले नाहीत. मग ते नक्की काय करीत आहेत? त्यांच्या टेबलावर मारुती स्तोत्र आहे का? जेवढे खुलासे कराल तेवढे फसाल! झाला तेवढा तमाशा पुरेसा नाही काय!,” असा सूचक इशाराही राऊतांनी दिला होता.

    “ग्राऊंड फ्लोअरवर रेस्टॉरंट आणि कॅसिनो एकच आहे”
    यावर बावनकुळेंनी ‘एक्स’ अकाउंटवर लिहिलं की, “मी मकाऊ येथे ज्या हॉटेलमध्ये सहकुटुंब मुक्कामी होतो, तेथील हा परिसर आहे. या हॉटेलच्या ग्राऊंड फ्लोअरवर रेस्टॉरंट आणि कॅसिनो एकच आहे. जेवण केल्यानंतर मी कुटुंबीयांसह रेस्टॉरंटमध्ये बसलो असताना कुणीतरी काढलेला हा फोटो आहे.”

    “प्रदेशाध्यक्ष कॅसिनोत जुगार खेळत असतील, तर…”
    काँग्रेस प्रदेशाध्यक्ष नाना पटोले यांनीही बावनकुळेंच्या फोटोवर प्रतिक्रिया व्यक्त केली आहे. नाना पटोले म्हणाले, “महाराष्ट्रात दुष्काळाची परिस्थिती आहे. दुसरीकडे, भाजपाच्या प्रदेशाध्यक्षांचा फोटो समोर आला आहे. या फोटोचा तपास केला पाहिजे. याची सीबीआय चौकशी झाली पाहिजे. भाजपाचे प्रदेशाध्यक्ष कॅसिनोत जुगार खेळत असतील, तर ही महाराष्ट्रासाठी गंभीर बाब आहे.”