दादरच्या प्रभादेवी परिसरात काही महिन्यांपूर्वी गणपती विसर्जनाच्या मिरवणुकीत शिवसेनेचे ठाकरे आणि शिंदे गट आमनेसामने आल्याचं समोर आलं होतं. त्यातून उफाळलेल्या वादात गोळीबार झाला होता. हा गोळीबार आमदार सदा सरवणकर यांनी केल्याचा आरोप करण्यात येत होता.
मुंबई : मुख्यमंत्री एकनाथ शिंदे (Eknath Shinde) यांच्या शिवसेना पक्षाचे आमदार सदा सरवणकर (Sada Sarvankar) यांच्यावर गुन्हा दाखल करण्यात आला आहे. राज्याचे गृहमंत्री देवेंद्र फडणवीस(Devendra Fadnavis) यांनी आज विधान परिषदेत याबाबत माहिती दिली आहे. विशेष म्हणजे सदा सरवणकर यांच्याकडील रिव्हॉल्वरचं लायसन्सदेखील रद्द करण्याची कारवाई सुरु करण्यात आल्याचं फडणवीस यांनी सांगितलं.
“राज्यात लोकप्रतिनिधी आणि खासगी व्यक्तींकडून झालेला गोळीबार हा विषय आपण मांडला होता. ज्यामध्ये आपण सदा सरवणकर यांचा विषय मांडला होता. या नमूद गुन्ह्यामध्ये 14 साक्षीदार तपासले. या प्रकरणात सदा सरवणकर, त्यांचा मुलगा समाधान सरवणकर अशा एकूण 11 आरोपींवर कलम 41 अ अन्वये नोटीस देण्यात आली”, अशी माहिती देवेंद्र फडणवीस यांनी दिली.
“त्याचप्रमाणे त्यांचं जे लायसन्सधारी पिस्तूल आहे ते त्यांनी स्वत: सोबत बाळगणं आवश्यक असताना त्यांनी ते गाडीत ठेवलं. असं ते ठेवता येत नाही. त्यामुळे त्यांच्यावर कारवाई करण्यात आली आहे. त्यांनी लायसन्स आणि शर्थी नियमांचं उल्लंघन केलं असल्याने त्यांना जो काही शस्त्र परवाना दिलाय तो रद्द करण्याची कारवाई सुरु करण्यात आली आहे”, अशी माहिती देवेंद्र फडणवीस यांनी विधान परिषदेत दिली.
या प्रकरणी 15 दिवसांपूर्वी पोलिसांकडून मोठा खुलासा करण्यात आला. सदा सरवणकर यांच्या बंदुकीतून हवेत गोळीबार झाला होता. पण तो गोळीबार सदा सरवणकर यांनी केला नव्हता, असं सांगण्यात आलं. गोळीबाराची घटना खरी होती हे पोलीस तपासातून आधीच स्पष्ट झालं आहे. संबंधित प्रकरणी पोलिसांचा अधिक तपास सुरु आहे. या प्रकरणी विधान परिषदेत विरोधकांकडून प्रश्न उपस्थित करण्यात आल्यानंतर देवेंद्र फडणवीस यांच्याकडून स्पष्टीकरण देण्यात आलं.
प्रकरण काय ?
दादरच्या प्रभादेवी परिसरात काही महिन्यांपूर्वी गणपती विसर्जनाच्या मिरवणुकीत शिवसेनेचे ठाकरे आणि शिंदे गट आमनेसामने आल्याचं समोर आलं होतं. त्यातून उफाळलेल्या वादात गोळीबार झाला होता. हा गोळीबार आमदार सदा सरवणकर यांनी केल्याचा आरोप करण्यात येत होता. या प्रकरणी पोलिसांचा तपास सुरु आहे. पण आतापर्यंत पोलीस तपासातून एक गोष्ट समोर आलीय, ती म्हणजे त्यावेळी गोळीबार झाला होता. पण सदा सरवणकर यांनी तो गोळीबार केला नव्हता.
Loading ...