जेजुरीत जयघाेषात चंपाषष्ठी उत्सव सुरु ; सहा दिवस धार्मिक कार्यक्रम,  मंदिराला आकर्षक सजावट

तीर्थक्षेत्र जेजुरीत चंपाषष्टी उत्सवाला सुरुवात झाली असून जेजुरीत षडरात्रोत्सव साजरा होत आहे. ‘येळकोट येळकोट जय मल्हार’चा जयघोष आणि भंडार खोबऱ्याच्या उधळणीत बालदारीत करवीर पीठाचे आद्य शंकराचार्य श्रीनृसिंह भारती यांच्या हस्ते घटस्थापना करण्यात आली.

    जेजुरी : तीर्थक्षेत्र जेजुरीत चंपाषष्टी उत्सवाला सुरुवात झाली असून जेजुरीत षडरात्रोत्सव साजरा होत आहे. ‘येळकोट येळकोट जय मल्हार’चा जयघोष आणि भंडार खोबऱ्याच्या उधळणीत बालदारीत करवीर पीठाचे आद्य शंकराचार्य श्रीनृसिंह भारती यांच्या हस्ते घटस्थापना करण्यात आली.

    उत्सवाचा प्रारंभ करताना बुधवारी पहाटेच मुख्य मंदिरात पाकाळणी करण्यात आली. मार्तंड भैरव मूर्तीला दही, दूध व तेलाने स्नान घालण्यात आले. सभोवताली गाभाऱ्यात फुलांची आकर्षक सजावट करण्यात आली.

    महापूजा उरकल्यानंतर श्री खंडोबा व म्हाळसा देवीच्या उत्सव मूर्तींना मिरवणुकीने मंदिर प्रदक्षिणा घालण्यात आली. प्रदक्षिणेनंतर बालदारीत उत्सव मूर्तींना आणण्यात आले. मंगलमय वातावरणात तेथे उत्सवमूर्तीची स्थापना करून समोरच दुपारी १२:३० वाजता शंकराचार्य श्रीनृसिंह भारती यांच्या हस्ते घट बसवण्यात आले. यावेळी वेदमूर्ती पुरोहित शशिकांत सेवेकरी, मंगेश खाडे गुरुजी यांच्या मंत्रोच्चारात व सनई चौघड्याच्या सुरेल वादनात देवांची महाआरती, भंडार खोबऱ्याची उधळण तसेच पुष्पवृष्टीही करण्यात आली. देवाचे मानकरी, पुजारी सेवक वर्गाकडून उत्सवमूर्तींना सुवर्ण व चांदीचे दागिने चढविण्यात आले.

    मार्तंड देवसंस्थान, जयमल्हार चंपाषष्टी प्रतिष्ठानच्यावतीने संपूर्ण गडकोटाला विद्युत रोषणाई करण्यात आली आहे. गाभाऱ्यात व मंदिराला आकर्षक फुलांची सजावट केली आहे. यावेळी मार्तंड देव संस्थानचे प्रमुख विश्वस्त पोपट खोमणे, विश्वस्त मंगेश घोणे, ॲड. पांडुरंग थोरवे, ॲड. विश्वास पानसे, डॉ. राजेंद्र खेडेकर, अनिल सौन्दडे, अभिजित देवकाते, तसेच सेवेकरी गणेश आगलावे, अविनाश सातभाई, प्रशांत सातभाई, बाळासाहेब दिडभाई, देवल बारभाई, मल्हार बारभाई, धनंजय आगलावे आदींनी सहभाग घेतला होता. उत्सवाचे नियोजन देवाचे सेवेकरी, पुजारी मानकरी मंडळाकडून करण्यात आले आहे.

    तेव्हापासून साजरा हाेताेय विजयाेत्सव

    पौराणिक काळात ऋषी मुनींना त्रास देणाऱ्या मणी व मल्ल दैत्यांचा संहार करण्यासाठी महादेवाने मल्हारी मार्तंडाचा अवतार धरण करून चंपाषष्टीच्या दिवशी दैत्यांचा वध करून विजय मिळवला. हे युद्ध मार्गशीर्ष शुद्ध प्रतिपदा ते षष्ठीपर्यंत ६ दिवस चालले होते. तेव्हापासून या सहा दिवसात खंडोबा गडावर विजयोत्सव साजरा केला जातो. चंपाषष्ठी हा दिवस विजय दिन म्हणूनही साजरा केला जातो.