वन विभागाला क्षेत्र महाबळेश्वर देवस्थानची सुमारे १६६ एकर मिळकत दोन महिन्यात मोकळी करुन ताब्यात देण्याचे तसेच थकबाकीची रक्कम देखील देवस्थानला ६% व्याजासह देण्याचा आदेश दिल्याने वन विभागाला मोठा झटका बसला आहे.
महाबळेश्वर : वन विभागाला क्षेत्र महाबळेश्वर देवस्थानची सुमारे १६६ एकर मिळकत दोन महिन्यात मोकळी करुन ताब्यात देण्याचे तसेच थकबाकीची रक्कम देखील देवस्थानला ६% व्याजासह देण्याचा आदेश दिल्याने वन विभागाला मोठा झटका बसला आहे.
महाबळेश्वर येथील वेण्णा लेक परिसरातील सर्वे नंबर ५२ व ६५ मधील एकूण १६६ एकर मिळकत ही वन विभागाने देवस्थान कडून १९४३ साली साठ वर्षाच्या कराराने लीजवर (भाडेपट्ट्यावर) तात्कालीन जिल्हाधिकारी यांच्या आदेशाने घेतली होती. यावेळी झालेल्या कराराप्रमाणे मिळकतीचे वार्षिक चार आणे एकरी भाडे आणि या जमिनीतून मिळणाऱ्या फायद्यामधून ५०% उत्पन्न श्री क्षेत्र महाबळेश्वर देवस्थानला देण्याचे मान्य केले होते. परंतू १९७५ सालापासून वन विभागाने भाडे देणे बंद केले व फायदा देखील देण्यास नकार दिला. देवस्थानने याबाबत अनेकवेळा मागणी केल्यास महाराष्ट्र खाजगी वन ॲक्ट 1975 चा दाखला देऊन सदरची जमीन ही वन विभागाची असल्याचे दावा करत या मिळकतीवर आपला हक्क दाखवू लागले. यामुळे श्री क्षेत्र महाबळेश्वर देवस्थान ट्रस्टने वन विभागाच्या विरोधात १९९६ साली उत्पन्न मिळावे यासाठी दिवाणी न्यायालयात दावा दाखल केला व २००५ साली भाडेपट्टा करार संपल्याने मिळकत ताब्यात मिळावी यासाठी वेगळा दावा दाखल केला. अखेर २७ वर्षांच्या न्यायालयीन लढ्यानंतर अखेर दिवाणी न्यायालयातून श्री क्षेत्र महाबळेश्वर देवस्थानला न्याय मिळाला व वन विभागाला मिळकत ताब्यात देण्याचे आदेश दिले तसेच उत्पन्नाबाबत देखील पूर्ण हिशोब करुन ६% व्याजासह देवस्थानला उत्पन्न देण्याचे आदेश दिले.
याच सर्वे नंबर मध्ये वन विभागाचे दोन रेस्ट हाऊस, स्मशानभूमी, प्रतापसिंह उद्यान, वेण्णा लेक चे वाहनतळ व दुकाने तसेच खडकाळ माळरान येते. तसेच कॅनॉट पिक देखील याच मिळकतीमध्ये समाविष्ट आहे. याबरोबर गहुगेरवा संशोधन केंद्र देखील याच मिळकतीमध्ये समाविष्ट असल्याने हा संपुर्ण परिसरातून देवस्थानच्या उत्पन्नात मोठ्या प्रमाणात भर पडणार आहे.
दरम्यान वन विभाग वेण्णालेक येथील मुख्य रस्त्यानजिक बांबू लागवड करण्यास सुरुवात करत होती. परंतू तहसिलदार तेजस्विनी पाटील यांनी न्यायालयाचा दाखला देत हे काम त्वरित थांबवण्याचे आदेश वन विभागाला दिले आहेत.
सदरच्या दोन्ही दाव्यात देवस्थान ट्रस्टचे सर्व विश्वस्त मंडळाने अथक प्रयत्न केले. तसेच दोन्ही दाव्यांचे पहिल्या पासून निकाला पर्यंतचे संपूर्ण काम ॲड. आर. एन. कुलकर्णी, सातारा यांनी पूर्ण जबाबदारीने पार पाडून देवस्थान ट्रस्टच्या विश्वस्त मंडळाने टाकलेला विश्वास त्यांनी सार्थ ठरविला. त्यांचे सर्वत्र अभिनंदन होत आहे.
Loading ...