तुकोबांच्या शिळामंदिर लोकार्पणासाठी देहूत जय्यत तयारी

२० जूनला तुकोबांच्या पालखीचे पंढरपूरकडे प्रस्थान होणार असून त्यापूर्वी पंतप्रधान देहूत येणार असल्याने वारकरी संप्रदायात उत्साहाचे वातावरण निर्माण झाले आहे.

    पुणे – श्रीक्षेत्र देहूत जगद्गुरू संत तुकाराम महाराज यांच्या शिळामंदिराचे लोकार्पण करण्यासाठी पंतप्रधान नरेंद्र मोदी येत्या १४ जूनला देहूत येणार आहेत. त्या निमित्ताने मंदिरात आणि देहू परिसरात जय्यत तयारी सुरू आहे. २० जूनला तुकोबांच्या पालखीचे पंढरपूरकडे प्रस्थान होणार असून त्यापूर्वी पंतप्रधान देहूत येणार असल्याने वारकरी संप्रदायात उत्साहाचे वातावरण निर्माण झाले आहे.

    देहूतील मुख्य मंदिरामध्ये दगडात कोरीव काम करून साकारण्यात आलेल्या या शिळामंदिराची पायाभरणी प्रतिभा पाटील राष्ट्रपती असताना झाली होती. त्याचे लोकार्पण पंतप्रधानांच्या हस्ते व्हावे, असा संस्थानचा आग्रह होता. त्यादृष्टीने २९ मार्च २०२२ रोजी पंतप्रधानांना निमंत्रण देण्यासाठी संस्थानचे विश्वस्त मंडळ दिल्लीत गेले होते. त्यानुसार या कार्यक्रमासाठी १४ जूनची तारीख निश्चित करण्यात आली होती.