आषाढीच्या महापूजेचे मंदिर समितीकडून मुख्यमंत्र्यांना निमंत्रण; चर्चेदरम्यान ठाकरे म्हणाले…

पंढरपूरच्या विठ्ठल रुक्मिणी मंदिर समितीच्या वतीने मुख्यमंत्री उद्धव ठाकरे (CM Uddhav Thackeray) यांना आषाढी एकादशीच्या विठ्ठल-रुक्मिणी महापूजेचे निमंत्रण देण्यात आले. 'वर्षा' शासकीय निवासस्थानी मंदिर समितीचे सहअध्यक्ष औसेकर महाराज यांनी हे निमंत्रण दिले.

    मुंबई : पंढरपूरच्या विठ्ठल रुक्मिणी मंदिर समितीच्या वतीने मुख्यमंत्री उद्धव ठाकरे (CM Uddhav Thackeray) यांना आषाढी एकादशीच्या विठ्ठल-रुक्मिणी महापूजेचे निमंत्रण देण्यात आले. ‘वर्षा’ शासकीय निवासस्थानी मंदिर समितीचे सहअध्यक्ष औसेकर महाराज यांनी हे निमंत्रण दिले. यावेळी मंदिर समितीचे विश्वस्त संभाजी शिंदे, ॲड. माधवी निगडे, ज्ञानेश्वर जळगांवकर, मंदिराचे व्यवस्थापक बालाजी पुदलवाड आदी उपस्थित होते.

    निमंत्रण देण्यासाठी आलेल्या विश्वस्तांशी मुख्यमंत्री ठाकरे यांनी चर्चाही केली. ‘पंढरपूरातील विकासकामांचे चांगल्या पद्धतीने नियोजन करा. वारकऱ्यांच्या सुविधांसाठी तसेच परिसराच्या विकासकामांसाठी आवश्यक निधी कमी पडू दिला जाणार नाही,’ अशी ग्वाहीही मुख्यमंत्र्यांनी यावेळी दिली.

     

    गेल्यावर्षी सत्यभामा मंदिर परिसरात केलेल्या वृक्षारोपणाची मुख्यमंत्र्यांनी आवर्जून माहिती घेतली. पंढरपूर मंदिर परिसरातील विविध विकासकामांसाठी शासनाने 73 कोटींचा निधी उपलब्ध करून दिला आहे. त्याअंतर्गत कामांबाबत चर्चा झाली. अशा पद्धतीने निधी देण्याचे जाहीर करून तो लगेचच उपलब्ध करून दिल्याबद्दल समितीने समाधान व्यक्त केले. मंदिर समितीच्या वतीने औसेकर महाराज यांनी मुख्यमंत्री ठाकरे यांचा श्री विठ्ठलाची मूर्ती, वीणा, शेला-पागोटे देऊन सत्कार केला.