उपमुख्यमंत्री अजित पवार कोरोना व्हायरसबाबत म्हणाले, ‘…तरीही खबरदारी घ्यावी’

गेल्या काही दिवसांपासून कोरोनाबाधित रुग्णांच्या संख्येत वाढ होताना दिसत आहे. त्यात आता यावर उपमुख्यमंत्री अजित पवार यांनी भाष्य केले. 'कोरोनाच्या नवीन व्हेरीयंटची पूर्वी इतकी तीव्रता नाही, तरीही खबरदारी घेतली पाहिजे. घाबरून न जाता डॉक्टरांचा सल्ला घेतला पाहिजे', असे ते म्हणाले.  

    पुणे : गेल्या काही दिवसांपासून कोरोनाबाधित रुग्णांच्या संख्येत वाढ होताना दिसत आहे. त्यात आता यावर उपमुख्यमंत्री अजित पवार यांनी भाष्य केले. ‘कोरोनाच्या नवीन व्हेरीयंटची पूर्वी इतकी तीव्रता नाही, तरीही खबरदारी घेतली पाहिजे. घाबरून न जाता डॉक्टरांचा सल्ला घेतला पाहिजे’, असे ते म्हणाले.

    पुण्यात पत्रकारांशी बोलताना पवार यांना कोरोनाच्या नवीन व्हेरीयंटच्या संसर्गाविषयी विचारले असता ते म्हणाले,’ यापूर्वी कोरोनाबाबत जी तीव्रता होती ती आता नाहीये. यात काळजी घेणे, मास्क लावणे, अशी खबरदारी घेतली पाहिजे.

    तज्ञ डॉक्टरांच्या मते घाबरून जाऊ नये, मात्र काळजी घेतली पाहिजे.’ पाण्याच्या संदर्भात विचारलेल्या प्रश्नावर ते म्हणाले, ‘गेल्यावर्षीच्या तुलनेत पाण्याचा साठा कमी आहे. राज्यात सगळीकडे अशी परिस्थिती आहे.

    सर्व्हेक्षणाला अर्थ नाही

    लोकसभा निवडणुकीच्या पार्श्वभूमीवर एका संस्थेने केलेल्या सर्व्हेक्षणाबाबत पवार म्हणाले, अशा सर्व्हेक्षणाला काही अर्थ नसतो. पाच राज्यात नुकत्याच निवडणुका झाल्या तेव्हा आपण पाहिले की सर्व्हेक्षण काय होते आणि प्रत्यक्ष निकाल काय लागला. त्यांनी सर्व्हे केला असेल तर आम्ही तिन्ही पक्ष काळजी घेऊ आणि वातावरण महायुतीच्या बाजूने कसे राहील यासाठी प्रयत्न करू.