तज्ञ अधिकाऱ्यांनी केली रक्षा खडसे यांच्या उपस्थितीत रोगग्रस्त पिकांची पाहणी…

कृषी व किसान कल्याण मंत्रालय, भारत सरकार संचालित केंद्रीय एकात्मिक कीड व्यवस्थापन केंद्र, नाशिक यांच्या तज्ञ अधिकाऱ्यांनी आज खासदार रक्षा खडसे यांच्या उपस्थितीत मौजे मस्कावद (रावेर) येथे भेट देऊन केळी पिकावर आलेल्या कुकुंबर मोझाक व्हायरस (सीएमव्ही) या रोगाने ग्रासित पिकांची पाहणी केली.

    जळगाव : कृषी व किसान कल्याण मंत्रालय, भारत सरकार संचालित केंद्रीय एकात्मिक कीड व्यवस्थापन केंद्र, नाशिक यांच्या तज्ञ अधिकाऱ्यांनी आज खासदार रक्षा खडसे यांच्या उपस्थितीत मौजे मस्कावद (रावेर) येथे भेट देऊन केळी पिकावर आलेल्या कुकुंबर मोझाक व्हायरस (सीएमव्ही) या रोगाने ग्रासित पिकांची पाहणी केली.

    महाराष्ट्र राज्यात केळी पिकाखालील सर्वाधिक क्षेत्र जळगांव जिल्ह्यात असून केळीचे सर्वाधिक उत्पादनही जळगांव जिल्ह्यातील तापी व पुर्णा नदीच्या काठाने असलेल्या भागात होते. केळी करपा हा केळी पिकावरील महत्वाचा बुरशीजन्य रोग व कुकुंबर मोझाक व्हायरस मुळे दरवर्षी केळीचे मोठ्या प्रमाणावार नुकसान होते. सीएमव्ही हा रोग जास्त करून ऑगस्ट व सप्टेंबर या महिन्यामध्ये जास्त आढळून येत असतो. त्यातच अवकाळी वादळ. जोरदार पाऊस, गारपीट व कमी-जास्त तापमान यामुळे चिंतेत असलेल्या शेतकऱ्यांना मोठे संकट उभे राहते.

    याबाबत खासदार रक्षा खडसे यांनी केंद्रीय कृषी मंत्री, कृषी राज्यमंत्री तसेच महाराष्ट्राचे तत्कालीन व सध्याचे कृषिमंत्री व कृषी सचिव यांना सदर रोग केंद्राच्या “राष्ट्रीय कृषी विकास योजना” मध्ये समावेश होणे तसेच केळी पीक विम्यात याचा समावेश होणे बाबत मागणी केली होती. त्यानुसार कृषी व किसान कल्याण मंत्रालय, भारत सरकार संचालित केंद्रीय एकात्मिक कीड व्यवस्थापन केंद्र, नाशिक यांच्या तज्ञ अधिकाऱ्यांनी जिल्ह्यातील केळी भागाचा दौरा केला. यावेळी खासदार रक्षा खडसे यांनी त्यांना केळी उत्पादक शेतकऱ्यांच्या समस्या सांगून अहवाल सदर करण्याबाबत योग्य त्या सूचना केल्या.

    यावेळी खासदार रक्षा खडसे यांच्यासह केंद्रीय एकात्मिक कीड व्यवस्थापन केंद्र, नाशिकचे सहायक संचालक डॉ. अतुल ठाकरे, सहायक वनस्पती संरक्षण अधिकारी विशाल काशीद, सहायक वनस्पती संरक्षण अधिकारी ऋषीकेश मानकर, शास्त्रज्ञ केळी संशोधन केंद्र, जळगाव जी. पी. देशमुख, तालुका कृषी अधिकारी रावेर मयूर भामरे, तालुका तंत्रज्ञान व्यवस्थापक, रावेर चंद्रकांत माळी यांच्यासह परिसरातील केळी उत्पादक शेतकरी उपस्थित होते.