नांदेडमध्ये कार आणि ट्रकचा भीषण अपघात, एकाच कुटुंबातील चौघांचा मृत्यू

देगलूरकडून येणारा ट्रक आणि कारचा भीषण अपघात झाला. अपघातात एकाच कुटुंबातील आई, वडील, मुलगा, मुलगी ठार झाली.

    नांदे़ड : दिवसेंदिवस रस्ते अपघातामध्ये वाढ होताना दिसत आहे. गुरुवारी रात्रीच्या सुमारास नांदेड-हैदराबाद महामार्गावर कार आणि ट्रकचा समोरासमोर भीषण अपघात झाल्याची घटना उघडकीस आली. या अपघातात एकाच कुटुंबातील चारजणांचा मृत्यू  झाला तर एक जण जखमी झाला आहे. नायगाव तालुक्यातील कुंचेली फाटा इथं शुक्रवारी रात्री आठच्या सुमारास हा अपघात घडला. शंकरराव जाधव, महानंदा जाधव, धनराज जाधव आणि कल्पना शिंदे अशी मृतांची नावे आहेत. तर स्वाती पाटील ही गंभीर जखमी आहे.

    नायगाव तालुक्यातील (तमा) टाकळी येथून केरुर येथे कारने पाचहीजण जात होते. त्यावेळी देगलूरकडून येणारा ट्रक आणि कारचा भीषण अपघात झाला. अपघातात एकाच कुटुंबातील आई, वडील, मुलगा, मुलगी ठार झाली. तर विवाहित असलेली नात स्वाती बचावली असून तिच्यावर उपचार सुरू आहेत. अपघातस्थळावर बघ्यांची मोठी गर्दी जमली होती. अपघातामुळे काही काळ वाहतूक व्यवस्था ही ठप्प झाली होती.