गावांच्या विकासासाठी निधी कमी पडू देणार नाही: आ. दत्तात्रय भरणे

गावच्या भल्यासाठी मेहनत घ्या,विकासकामाला निधीची कमतरता भासू देणार नाही.अशी ग्वाही आमदार दत्तात्रय भरणे यांनी नवनिर्वाचित गाव-कारभाऱ्याना दिली आहे.

    इंदापूर : गावच्या भल्यासाठी मेहनत घ्या,विकासकामाला निधीची कमतरता भासू देणार नाही.अशी ग्वाही आमदार दत्तात्रय भरणे यांनी नवनिर्वाचित गाव-कारभाऱ्याना दिली आहे.

    भरणेवाडी (ता. इंदापूर) येथे आ. भरणे यांच्या निवासस्थानी नवनिर्वाचित उप सरपंचांचा सत्कार समारंभ रविवारी (दि.२६) संपन्न झाला.यावेळी ते बोलत होते.

    नुकत्याच पार पडलेल्या सहा ग्रामपंचायतच्या पंचवार्षिक निवडणुकीमध्ये आपल्याला चांगले यश मिळाले असून सहा ग्रामपंचायती पैकी तब्बल पाच ग्रामपंचायती आपल्या विचाराच्या पॅनलने जिंकल्या आहेत.त्यामुळे तुमच्या सर्वांवरील जबाबदारी वाढली आहे. गावच्या भल्यासाठी सरपंच, उपसरपंचासहित सर्व ग्रामपंचायत सदस्यांनी एकत्रितपणे प्रयत्न करावेत.निधीच्या बाबतीत लोकप्रतिनिधी म्हणून कसलीही कमतरता भासू देणार नाही.असा शब्द आ. भरणे यांनी यावेळी दिला.

    ते म्हणाले की, खऱ्या अर्थानने राजकीय कारकिर्दीची पहिली पायरी म्हणजे ग्रामपंचायत निवडणूक असते,आपले व्यक्तिमत्त्व,कर्तुत्व आणि सामाजिक कार्याचे प्रतिबिंब गावगाड्यामध्ये उमटत असते.त्यामुळे गावकऱ्यांच्या मनामध्ये विश्वासार्हता निर्माण करून अनेक ठिकाणांच्या आपल्या तरुण सहकाऱ्यांनी निवडणुकीच्या रिंगणात उतरून यशाला गवासणी घातली असल्याने खऱ्या अर्थाने तुम्ही सर्वजण कौतुकास पात्र आहात. असे म्हणत आ.भरणे यांनी नवनिर्वाचित उपसरपंच व सदस्यांना सल्ले दिले.

    यावेळी जिल्हा परिषदेचे माजी सदस्य प्रताप पाटील,छत्रपती सहकारी साखर कारखान्याचे संचालक लक्ष्मण शिंगाडे,जिल्हा नियोजन समितीचे सदस्य सचिन सपकळ,जंक्शनचे माजी सरपंच राजकुमार भोसले,युवक राष्ट्रवादीचे तालुकाध्यक्ष शुभम निंबाळकर,महिला अध्यक्ष साधना केकान,कार्याध्यक्ष उज्वला परदेशी यांच्यासह अनेक मान्यवर उपस्थित होते.