महामानव, भारतरत्न डॉ. बाबासाहेबांच्या विचारांमध्येच देशाचं, अखिल मानवजातीचं कल्याण; विरोधी पक्षनेते अजित पवार यांचे महामानवाला कृतज्ञतापूर्वक अभिवादन

विरोधी पक्षनेते अजित पवार आपल्या अभिवादनपर संदेशात म्हणतात, “भारतीय संविधानाचे शिल्पकार, भारतरत्न डॉ. बाबासाहेब आंबेडकर यांनी देशातील गरीब, वंचित, दुर्बल, उपेक्षित बांधवांना समानतेचा हक्क आणि स्वाभिमानासाठी लढण्याचं बळ दिलं.

    मुंबई : महामानव, भारतरत्न डॉ बाबासाहेब आंबेडकर (Babasaheb Ambedkar Jayanti) यांनी वेळोवेळी बजावलेली भूमिका, मानवतेच्या कल्याणासाठी दिलेले लढे हे देशाच्या राजकीय, सामाजिक, आर्थिक सुधारणांच्या चळवळीतील क्रांतिकारी टप्पे आहेत. डॉ. बाबासाहेब कृतीशील विचारवंत होते. ध्येयासाठी, विचारांसाठी लढण्याची ताकद त्यांनी समाजाला (Social) दिली. शिका, संघटीत व्हा, संघर्ष करा हा त्यांचा संदेश प्रत्येक व्यक्तीला त्याच्या हक्कांची जाणीव करून देणारा आहे. बाबासाहेबांच्या विचारातंच देशाचं, अखिल मानवजातीचं कल्याण आहे, अशा शब्दात विधानसभेचे विरोधी पक्षनेते अजित पवार (Ajit Pawar) यांनी डॉ. बाबासाहेबांच्या जयंतीनिमित्त त्यांच्या कार्याचं, विचारांचं, स्मृतींचं स्मरण करुन त्यांना अभिवादन केलं आहे.

    देशाची सार्वभौमता अखंडित ठेवण्याचं काम बाबासाहेबांमुळं

    विरोधी पक्षनेते अजित पवार आपल्या अभिवादनपर संदेशात म्हणतात, “भारतीय संविधानाचे शिल्पकार, भारतरत्न डॉ. बाबासाहेब आंबेडकर यांनी देशातील गरीब, वंचित, दुर्बल, उपेक्षित बांधवांना समानतेचा हक्क आणि स्वाभिमानासाठी लढण्याचं बळ दिलं. ‘शिका आणि संघटीत व्हा’ या त्यांच्या संदेशानं बहुजनांच्या कित्येक पिढ्यांचं कल्याण केलं. राजकीय, सामाजिक, सांस्कृतिक, अध्यात्मिक, भौगोलिक विविधतेच्या भारत देशाला एकता, समता, बंधूतेच्या सूत्रात बांधण्याचं, देशाची सार्वभौमता अखंडित ठेवण्याचं काम बाबासाहेबांनी दिलेल्या संविधानामुळे शक्य झालं.

    जगण्याची, विकासाची समान संधी…

    नागरिकांना एका मताचा समान अधिकार, सर्वांना स्वाभिमानानं जगण्याची, विकासाची समान संधी उपलब्ध करुन देणारे डॉ. बाबासाहेब युगपुरुष होते. त्यांचे विचार हे कुठल्या एका जातीच्या, धर्माच्या, पंथाच्या, प्रांताच्या कल्याणासाठी नव्हते, तर अखिल मानवजातीच्या कल्याणाची ताकद त्यांच्या विचारांमध्ये आहे. डॉ. बाबासाहेबांचा मानवकल्याणाचा विचार पुढे घेऊन जाणं, समाजातील सर्व घटकांना सोबत घेऊन देशाचा विकास करणं, हेच डॉ. बाबासाहेबांना खरं अभिवादन ठरेल,” अशा शब्दात विरोधी पक्षनेते अजित पवार यांनी भारतरत्न डॉ. बाबासाहेबांना जयंतीनिमित्त अभिवादन केलं असून सर्वांना डॉ. बाबासाहेब आंबेडकर जयंतीच्या शुभेच्छा दिल्या आहेत.