केडीएमसी क्षेत्रात धुळप्रतिबंधात्मक उपाययोजना तात्काळ अंमलात आणण्याचे आयुक्त डॉ.इंदुराणी जाखड यांचे सक्त निर्देश

प्रादेशिक परिवहन विभागास कळविण्यात आल्याची माहिती पर्यावरण व प्रदुषण नियंत्रण विभागाच्या कार्यकारी अभियंता रोहिणी लोकरे यांनी दिली.

    कल्याण : उच्च न्यायालयातील दाखल सुमोटो जनहित याचिका क्र. ०३/२०२३ मधील दि. ०६ नोव्हेंबर २०२३ रोजीच्या निर्णयान्वये महापालिका क्षेत्रात धुळ प्रतिबंधात्मक उपाययोजनांवर तात्काळ अंमलबजावणी करण्यासाठी येत्या २ दिवसांत पाहणी करुन नियमांचे, मार्गदर्शक सूचनांचे उल्लंघन करणाऱ्यांवर कडक कारवाई करण्याचे निर्देश कल्याण डोंबिवली महापालिका आयुक्त डॉ.इंदुराणी जाखड यांनी काल संपन्न झालेल्या बैठकीत संबंधित अधिकाऱ्यांना दिले.

    त्याअनुषंगाने धुळ प्रतिबंधात्मक उपाययोजना अंमलात आणणेकामी ब प्रभागात सहा.आयुक्त राजेश सावंत यांनी १० बांधकाम विकासकांना, जे प्रभागाच्या सहा. आयुक्त सविता हिले यांनी ४ बांधकाम विकासकांना, तर फ प्रभागातही सहा.आयुक्त चंद्रकांत जगताप यांनी ५ बांधकाम विकासकांना, ई प्रभागात सहा. आयुक्त भारत पवार यांनी देखील ४ बांधकाम विकासकांना, त्याचप्रमाणे आय प्रभागाच्या हेमा मुंबरकर यांनी २ बांधकाम विकासकांना नियमांचे पालन करण्याबाबत नोटीसा बजाविल्या. क प्रभागात धुळ प्रतिबंधात्मक उपाययोजना केल्या नसल्याने सहा. आयुक्त तुषार सोनवणे यांच्या पथकाने काल सायंकाळी कल्याण पश्चिम येथील छत्रपती शिवाजी महाराज चौकातील साईं कृष्णा साइटचे बांधकाम बंद केले.

    डोंबिवली पूर्व येथील टंडन रोडवरील साखरी गणेश सोसायटी (तळ +३) या इमारतीचे पुनर्विकासासाठी तोडकाम करताना संबंधितांनी धुळ प्रतिबंधात्मक उपाययोजनांचे पालन न केल्याने सदरचे पाडकाम थांबविण्याची कारवाई ग प्रभागाच्या सहा.आयुक्त सोनम देशमुख यांच्या पथकाने केली असून, त्यांस आदेशाचे पालन करणेबाबत नोटीस बजाविण्यात आली.

    महापालिका क्षेत्रात बांधकाम साहित्याची वाहतुक करणाऱ्या वाहनांवर (वायु प्रदुषण नियंत्रण सूचनांचे पालन करत नसल्यास) कठोर कारवाई करण्याचे निर्देश महापालिका आयुक्त डॉ.इंदुराणी जाखड यांनी दिले असून, त्यानुसार प्रादेशिक परिवहन विभागास कळविण्यात आल्याची माहिती पर्यावरण व प्रदुषण नियंत्रण विभागाच्या कार्यकारी अभियंता रोहिणी लोकरे यांनी दिली.