आमच्या आयाबहिणींची थट्टा केली जात असेल तर राज्यात राष्ट्रपती राजवट लागू करणे हाच एक मार्ग आहे. या सरकारवर राष्ट्रपती राजवट लागू करण्याची वेळ आली आहे, असा इशारा सुधीर मुनगंटीवार यांनी दिला आहे. मुनगंटीवार यांच्या या मागणीला अल्पसंख्याक मंत्री नवाब मलिक यांनी हरकत घेऊन त्यांचं वक्तव्य कामकाजातून काढून टाकण्याची मागणी केली.
मुंबई: जळगाव वसतिगृह प्रकरणावरुन संताप व्यक्त करताना भाजप नेते सुधीर मुनगंटीवार यांनी राज्य सरकार काहीच कारवाई करत नसल्याची टीका केली आहे. आमच्या आयाबहिणींची थट्टा केली जात असेल तर राज्यात राष्ट्रपती राजवट लागू करणे हाच एक मार्ग आहे. या सरकारवर राष्ट्रपती राजवट लागू करण्याची वेळ आली आहे, असा इशारा सुधीर मुनगंटीवार यांनी दिला आहे. मुनगंटीवार यांच्या या मागणीला अल्पसंख्याक मंत्री नवाब मलिक यांनी हरकत घेऊन त्यांचं वक्तव्य कामकाजातून काढून टाकण्याची मागणी केली. त्यावर संबंधित वाक्य तपासून कामकाजातून काढून टाकण्यात येईल, असं विधानसभा अध्यक्षांनी स्पष्ट केलं.
जळगाव येथील एका वसतिगृहात काही तरुणींना विवस्त्र होऊन नृत्य करण्याची सक्ती करण्यात येत असल्याचा व्हिडीओ व्हायरल झाला आहे. त्यामुळे एकच खळबळ उडाली आहे. आज विधानसभेत त्यावरून पडसाद उमटले. आमदार श्वेता महाले यांनी जळगावच्या आशादीप वसतिगृहाचा हा विषय काढला. पोलीस महिलांचे रक्षक आहेत. पण तेच महिलांवर अन्याय करत आहेत. महिलांना नग्न करून नाचवले जात आहे हे गंभीर आहे, असं महाले म्हणाल्या.
राष्ट्रपती राजवटीशिवाय पर्याय नाही
भाजप नेते सुधीर मुनंगटीवार यांनी या प्रकरणावरून प्रचंड संताप व्यक्त करत थेट राज्यात राष्ट्रपती राजवट लागू करण्याची वेळ आल्याचं सांगितल. मी संविधानाला मानणारा आहे. संविधानाचं पालन करणारा आहे. पण राज्यात आमच्या आयाबहिणींची होत असलेली थट्टा पाहता राज्यात राष्ट्रपती राजवट लागू करण्याशिवाय पर्याय नाही. आमच्या आयाबहिणीला नग्न केलं जातं हे महाराष्ट्राला शोभते काय? असा सवाल करतानाच सरकारवर राष्ट्रपती राजवट लागू करण्याची वेळ आली आहे. तशी मलाच मागणी करावी लागेल, असं ते म्हणाले.
Loading ...