मुंबईत एकट्या राहणाऱ्या वृद्धांना आता आठवड्यातून एक वेळा भेटून त्यांच्या समस्या जाणून घेणार पोलीस!

मुंबईमध्ये पोलिसांच्या बीट चौकीच्या परिसरात एकटे राहणाऱ्या वृद्ध नागरिकांची यादी तयार करुन तुमच्या वरिष्ठ अधिकाऱ्याला द्या आणि त्यांच्या घरी एक रजिस्टर देखील ठेवा असे आदेश मुंबई पोलीस आयुक्त संजय पांडे यांनी काढला आहे.

    मुंबई : मुंबई पोलीस आयुक्त संजय पांडे यांनी वृध्दांच्या सुरक्षेसंबधित एक महत्तावाच निर्णय घेतला आहे. आता”मुंबईत राहणाऱ्या वृद्ध नागरिकांना अनेक समस्यांना सामोरं जावं लागतं, त्यांना सुरक्षा पुरवणं हे मुंबई पोलिसांसाठी अत्यंत महत्त्वाचं काम आहे. पोलीस आयुक्तांनी जारी केलेल्या आदेशात नमूद करण्यात आलं आहे.

    वृध्द नागरिकांसाठी जारी करण्यात आलेला आदेश

    1. मुंबईमध्ये पोलिसांच्या बीट चौकीच्या परिसरात एकटे राहणाऱ्या वृद्ध नागरिकांची यादी तयार करुन तुमच्या वरिष्ठ अधिकाऱ्याला द्या आणि त्यांच्या घरी एक रजिस्टर देखील ठेवा.

    2. पोलीस बीट अधिकाऱ्यांनी त्यांच्या परिसरात एकट्या राहणाऱ्या वृद्धांना आठवड्यातून एक वेळा भेटून त्यांच्या समस्या जाणून घ्याव्या लागतील. जर वृद्ध महिला एकटी राहत असेल तर महिला पोलीस कर्मचारी तिच्या घरी जाऊन विचारपूस करेल. याबाबत संबंधित वृद्धाच्या घरी ठेवलेल्या रजिस्टरमध्ये सविस्तर माहिती लिहावी आणि त्यावर सही करावी.

    3. संजय पांडे आदेशात पुढे म्हणाले की, “पोलीस अधिकाऱ्यांनी आपापल्या हद्दीत एकट्या राहणाऱ्या वयोवृद्ध नागरिकांची विभागणी करावी. अधिकाऱ्याच्या नावापुढे ज्या वृद्ध नागरिकाचं नाव असेल त्यांनीच त्यांची काळजी घ्यावी, जेणेकरुन त्या वृद्धांनाही पोलीस अधिकाऱ्याशी बोलताना अवघडलेपण राहणार नाही.”

    4. याशिवाय, प्रत्येक पोलिस ठाण्याच्या प्रभारींनी त्यांच्या हद्दीतील वयोवृद्ध नागरिकांसाठी नेमलेला अधिकारी योग्य प्रकारे काम करत आहे की नाही, याची तपासणी करण्यासाठी अचानक भेट द्यावी. जर हे काम होत नसेल तर ते व्यवस्थितरित्या करता येऊ शकेल, असेही पांडे यांनी म्हटले आहे.

    5. पांडे यांनी आपल्या आदेशात असेही म्हटले आहे की, “त्या भागातील डीसीपी किंवा एसीपी यांनीही पोलीस ठाण्याच्या हद्दीत राहणाऱ्या कोणत्याही वृद्ध नागरिकाच्या घरी जाऊन त्यांचे अधिकारी काळजी घेत आहेत की नाही हे तपासावं लागेल.”